തണ്ണിത്തോട് : കോന്നിയിലെ മലയോര മേഖലയായ തണ്ണിത്തോട്ടില് ചെറിയ ഒരു കാറ്റോ മഴയോ വന്നാല് പോലും മണിക്കൂറുകള് വൈദ്യുതി നിലയ്ക്കുന്ന അവസ്ഥയാണ്. കഴിഞ്ഞ കുറച്ചു വര്ഷങ്ങള്ക്ക് മുമ്പ് വനത്തിനുള്ളില് കൂടിയായിരുന്നു തണ്ണിത്തോട്, തേക്കുതോട് മേഖലയിലേക്കുള്ള വൈദ്യുതി ലൈനുകള് കടന്നുപോയിരുന്നത്. എന്നാല് ഇത് പിന്നീട് പ്രധാന റോഡുവഴിയാക്കി. വനത്തില് കൂടി ലൈനുകള് കടന്നുപോകുമ്പോള് കാറ്റിലും മഴയിലും മരങ്ങള് ഒടിഞ്ഞ് വൈദ്യുതി ലൈനുകള്ക്ക് മുകളില് വീഴുന്നത് തുടര്ച്ചയായി കറണ്ട് പോകുന്നതിന് ഇടയാക്കിയിരുന്നു. ഇത് പരിഹരിക്കാനാണ് പ്രധാന റോഡില്ക്കൂടി ലൈനുകള് സ്ഥാപിച്ചത്. എന്നാല് ഇപ്പോഴും അവസ്ഥ പഴയതില് നിന്നും വത്യസ്ഥമല്ല.
കോന്നി കെ.എസ്.ഇ.ബി സബ് സ്റ്റേഷനില് നിന്നുമാണ് ഈ മേഖലയിലേക്ക് വൈദ്യുതി കടത്തി വിടുന്നത്. കോന്നിയില് എന്തെങ്കിലും തകരാര് സംഭവിച്ച് വൈദ്യുതി ബന്ധം നിലയ്കാതെയിരിക്കാന് ചിറ്റാര് ഭാഗത്തെ ഫീഡറില് നിന്നും നീലിപിലാവ് വഴി ഭൂഗര്ഭ കേബിളുകള് ഉപയോഗിച്ച് വൈദ്യുതി ലൈന് സ്ഥാപിച്ചിരുന്നു. മരങ്ങള് വീണ് വൈദ്യുതി തടസപ്പെടുന്നത് തടയാന് ഇത് സഹായിക്കുമെന്നും തണ്ണിത്തോട് മേഖലയിലേക്ക് ഒരിക്കലും വൈദ്യുതി നിലക്കില്ല എന്നും ആയിരുന്നു അന്ന് അധികൃതര് അവകാശവാദമുന്നയിച്ചത്. എന്നാല് കോന്നിയില് നിന്നും വൈദ്യുതി ലഭിക്കാതെ വന്നാല് ചിറ്റാറില് നിന്നുള്ള ലിങ്ക് പലപ്പോഴും കെ.എസ്.ഇ.ബി ജീവനക്കാര് ഇവിടെയ്ക്ക് ബന്ധിപ്പിക്കുന്നില്ല എന്നാണ് പരാതി ഉയരുന്നത്.
മലയോര മേഖലയില് വൈദ്യുതി ബന്ധം ഇടക്കിടെ ഇല്ലാതാകുന്നത് വ്യാപാരികളെ ഉള്പ്പെടെ കൂടതല് ബുദ്ധിമുട്ടിലാക്കുന്നു. കടകളില് ഫ്രീസറില് സൂക്ഷിക്കുന്ന ആഹാര സാധനങ്ങള് ഇത് മൂലം നശിക്കുകയാണ്. തണ്ണിത്തോട് റോഡില് പലപ്പോഴും വെളിച്ചമില്ലാതെ വരുന്നത് വന്യമൃഗ ഭീതിയും വര്ധിപ്പിക്കുന്നു. രാത്രി സമയങ്ങളില് കറണ്ട് പോയാല് കെ.എസ്.ഇ.ബി അധികൃതര് പ്രതികരിക്കാറില്ല എന്നും ആക്ഷേപമുണ്ട്.
