പത്തനംതിട്ട : രാഷ്ട്രപിതാവ് മഹാത്മാഗാന്ധിജിയെയും അദ്ദേഹത്തിന്റെ ദര്ശനങ്ങളെയും എത്ര തമസ്കരിച്ചാലും ഇന്ഡ്യയിലും ഈ ലോകത്തിലും ജന മനസ്സുകളില് അദ്ദേഹത്തിന്റെ നാമം സൂര്യശോഭയോടെ ജ്വലിച്ചു നില്ക്കുമെന്ന് കെ.പി.സി.സി രാഷ്ട്രീയകാര്യ സമിതി അംഗം ആന്റോ ആന്റണി എം.പി പറഞ്ഞു. മഹാത്മാഗാന്ധിയുടെ 78 -ാം രക്തസാക്ഷിത്വ അനുസ്മരണ സമ്മേളനം ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യുദ്ധങ്ങളും സംഘര്ഷങ്ങളും വര്ദ്ധിച്ചുവരുന്ന വര്ത്തമാന ലോകത്ത് ഗാന്ധിജിയുടെ അഹിംസാ മന്ത്രത്തിന്റെ പ്രസക്തി വര്ദ്ധിച്ചു വരികയാണെന്നും ആന്റോ ആന്റണി എം.പി പറഞ്ഞു.
ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് അദ്ധ്യക്ഷത വഹിച്ചു. മുന് എം.എല്.എ മാലേത്ത് സരളാദേവി, യു.ഡി.എഫ് ജില്ലാ കണ്വീനര് എ. ഷംസുദ്ദീന്, കെ.പി.സി.സി അംഗം മാത്യു കുളത്തിങ്കല്, കെ.കെ. റോയിസണ്, ഡി.സി.സി ഭാരവാഹികളായ എ. സുരേഷ് കുമാര്, സാമുവല് കിഴക്കുപുറം, റെജി തോമസ്, കെ. ജാസിംകുട്ടി, ജോണ്സണ് വിളവിനാല്, എസ്.വി. പ്രസന്നകുമാര്, ജെറി മാത്യു സാം, ശ്യം എസ്. കോന്നി, നേതാക്കളായ എബി മേക്കരിങ്ങാട്ട്, ബിനു വി ഈപ്പന്, അജിത്ത് മണ്ണില്, എ. ഫറൂഖ്, അബ്ദുള്കലാം ആസാദ്, നാസര് തോണ്ടമണ്ണില്, അജി അലക്സ്, ജെയിംസ് കീക്കരിക്കാട്, ഷിജു അറപ്പുരയില്, സുബ്ഹാന്, സജു ജോര്ജ്, രാജു വടക്കേചരുവില് എന്നിവര് പ്രസംഗിച്ചു.
