കണ്ണൂര് : ജയിപ്പിച്ച് വിടുന്ന കോണ്ഗ്രസുകാര് നാളെ അവിടെ നിൽക്കുമോ എന്ന് ഉറപ്പിക്കാനാവില്ലെന്ന് മുഖ്യമന്ത്രി പിണറായി വിജയന്. ജനാധിപത്യ വ്യവസ്ഥയ്ക്ക് നാണക്കേടുണ്ടാക്കുന്ന വിഭാഗമായി കോൺഗ്രസ് മാറിയെന്നും വിമർശനം. എൽ.ഡി.എഫ് കണ്ണൂർ ലോക്സഭാ മണ്ഡലം കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മുൻ കോൺഗ്രസ് മുഖ്യമന്ത്രിമാർ ഇപ്പോൾ ബിജെപിക്ക് ഒപ്പമാണ്. ഇനിയെത്രയെന്ന് ആർക്കും പറയാൻ കഴിയില്ല . ബി.ജെ.പി രണ്ടു കൈയ്യും നീട്ടി നിൽക്കുകയാണ്. പണം വേണ്ടവർക്ക് പണം, സ്ഥാനം വേണ്ടവർക്ക് സ്ഥാനം. അതിന്റെ കൂടെ ഒഴുകാൻ എല്ലിന് കഷ്ണമിട്ടാല് ഓടുന്ന സൈസ് ജീവികളില്ലേ, ആ സൈസ് ജീവികളാണ് കോൺഗ്രസിലുള്ളത്.
കഴിഞ്ഞ പത്ത് വർഷത്തിനിടെ അഞ്ഞൂറോളം മുതിർന്ന കോൺഗ്രസുകാർ പാർട്ടി വിട്ടു. കോൺഗ്രസ് ജയിച്ചാൽ കോൺഗ്രസായി നിൽക്കുമോ എന്ന് ഗ്യാരണ്ടിയില്ല. എന്താണ് കോൺഗ്രസിൻ്റെ അവസ്ഥ. പലരുമായും ചർച്ച നടക്കുന്നുവെന്നാണ് ബിജെപി നേതാക്കൾ പറയുന്നത്. വിലപേശലാണ് നടക്കുന്നത്. കോൺഗ്രസാണെന്ന് വിശ്വസിച്ച് ആരെയും വിജയിപ്പിക്കാനാകില്ലെന്നും അദ്ദേഹം വ്യക്തമാക്കി.
