കോന്നി : കോന്നി ആർ വി എച്ച് എസ് സ്കൂളിന് സമീപം സംസ്ഥാന പാതയിൽ നിന്ന് കോന്നി താലൂക്ക് ആശുപത്രിപടിയിലേക്കുള്ള റോഡിൽ വെളിച്ചമില്ലാത്തത് യാത്രക്കാരെ ബുദ്ധിമുട്ടിലാക്കുന്നു. സംസ്ഥാന പാതയിൽ നിന്ന് താലൂക്ക് ആശുപത്രിയിലേക്ക് പത്തനംതിട്ട ഭാഗത്ത് നിന്ന് വരുന്ന ആളുകൾക്ക് ടൗണിൽ കയറാതെ വേഗത്തിൽ എത്തിച്ചേരുവാൻ കഴിയുന്ന റോഡിൽ ആണ് രാത്രിയിൽ വെളിച്ചമില്ലാത്തത്. ഇന്റർലോക്ക് കട്ടകൾ പാകിയ റോഡിൽ വാഹനങ്ങളിലും കാൽ നടയാത്രയായും നിരവധി ആളുകൾ സഞ്ചരിക്കുന്നുണ്ട്.
റോഡിലെ ഓടയുടെ സ്ലാബുകൾ പലതും ഇളക്കി മാറ്റി റോഡിൽ വെച്ചിരിക്കുന്നത് മൂലം ആളുകൾ ഇതിൽ തട്ടി വീഴുവാൻ ഉള്ള സാധ്യതയും ഏറെയാണ്. കോന്നി പഞ്ചായത്തിന്റെ അധീനതയിൽ ഉള്ള റോഡിൽ മുൻപ് സ്ഥാപിച്ച ഇന്റർലോക്ക് കട്ടകളും കാലാവധി തീരും മുൻപേ ഇളകി മാറിയിരുന്നു. സംസ്ഥാന പാതയിൽ അപകടങ്ങൾ ഉണ്ടാകുമ്പോഴും ആളുകൾക്ക് അത്യാഹിതങ്ങൾ സംഭവിക്കുമ്പോഴും എല്ലാം വേഗത്തിൽ എത്തിച്ചേരുവാൻ കഴിയുന്ന ഒരു പാത കൂടിയാണ് ഇത്. സന്ധ്യ കഴിഞ്ഞാൽ ഇഴജന്തുക്കളുടെ ശല്യവും കൂടുതലാണ്.
