തിരുവനന്തപുരം : യു ഡി എഫ് നേതാക്കളുടെ യോഗത്തിലേക്ക് മുതിര്ന്ന നേതാക്കളായ ചെന്നിത്തലയെയും ഉമ്മന്ചാണ്ടിയെയും ക്ഷണിക്കാതെ നേതൃത്വം. കെ റെയില് അടക്കമുള്ള വിഷയങ്ങളില് സ്വീകരിക്കേണ്ട നിലപാടിനെ കുറിച്ചുള്ള ചര്ച്ചയിലാണ് ഇവര്ക്ക് പ്രവേശനം അനുവദിക്കാന് പാര്ട്ടി മടിക്കുന്നത്. സര്ക്കാരിന്റെ സ്വപ്ന പദ്ധതിയായ സില്വര് ലൈനിനെതിരെ സമരം ആരംഭിക്കുമെന്ന് കോണ്ഗ്രസ് ഇന്നലെ പ്രഖ്യാപിച്ചിരുന്നു. പ്രതിഷേധം ഏത് രീതിയില് വേണം എന്നതടക്കമുള്ള കാര്യങ്ങളില് തീരുമാനമെടുക്കാനാണ് യു ഡി എഫ് നേതാക്കള് ഇന്ന് യോഗം ചേരുന്നത്.
പ്രതിപക്ഷ നേതാവിന്റെ ഔദ്യോഗിക വസതിയിലാണ് യോഗം. എന്നാല് ഉമ്മന്ചാണ്ടിക്കും രമേശ് ചെന്നിത്തലയ്ക്കും ക്ഷണമില്ലെന്ന റിപ്പോര്ട്ടുകള് വന്നതോടെ കക്ഷി നേതാക്കളുടെ യോഗമായതിനാലാണ് ഇരുവരെയും ക്ഷണിക്കാതിരുന്നതെന്നാണ് പാര്ട്ടി ഉന്നതര് നല്കുന്ന വിശദീകരണം. തിരുവനന്തപുരത്ത് ഉണ്ടായിട്ടും കഴിഞ്ഞ തവണത്തെ യുഡിഎഫ് യോഗത്തിലും ഉമ്മന്ചാണ്ടിയും രമേശ് ചെന്നിത്തലയും പങ്കെടുത്തിരുന്നില്ല.
പാര്ട്ടിയിലെ തീരുമാനങ്ങള് കൂടിയാലോചനകളില്ലാതെ എടുക്കുന്നു എന്ന പരാതി ഇരു നേതാക്കളും ഉയര്ത്തുന്നുണ്ട്. ഇക്കാര്യം ദേശീയ നേതൃത്വത്തെ അറിയിക്കുകയും ചെയ്തിരുന്നു. അടുത്തിടെ ഗവര്ണറുമായുള്ള വിഷയത്തില് മുതിര്ന്ന നേതാവ് രമേശ് ചെന്നിത്തലയെ തള്ളി പ്രതിപക്ഷ നേതാവ് രംഗത്ത് വന്നതും ഏറെ വാര്ത്താ പ്രാധാന്യം നേടിയിരുന്നു.