അയിരൂർ : ആത്മവിശ്വാസമുണ്ടെങ്കിൽ ലോകത്ത് അസാധ്യമായി ഒന്നുമില്ലെന്ന് സൈക്കോളജിസ്റ്റ് ഡോ. അനൂപ് വൈക്കം. ചെറുകോൽപ്പുഴ പരിഷത്തിന്റെ നാലാം ദിവസം രാവിലെ നടന്ന ബാലവിജ്ഞാനസഭയിൽ മുഖ്യപ്രഭാഷണം നടത്തുകയായിരുന്നു അദ്ദേഹം. സഹജീവികളുടെ സുഖവും ദുഃഖവും അന്വേഷിക്കാനുള്ള നന്മ ചെറുപ്പത്തിലേ കാത്തുസൂക്ഷിക്കണമെന്നും എല്ലാകാര്യത്തിലും മുൻകൈയെടുത്തു പ്രവർത്തിക്കാനും ഏതു വേദിയിലും മുന്പിലിരിക്കാൻ കുട്ടികൾ ശീലിക്കണമെന്നും ഡോ. അനൂപ് പറഞ്ഞു.
അജയകുമാർ വല്യുഴത്തിൽ ഉദ്ഘാടനംചെയ്തു. ഹിന്ദുമത മഹാമണ്ഡലം പ്രസിഡന്റ് പി.എസ്. നായർ അധ്യക്ഷതവഹിച്ചു. ഹിന്ദുമത മഹാമണ്ഡലം ജനറൽ കമ്മിറ്റിയംഗങ്ങളായ ഗിരീഷ് ചിത്രശാല, കെ.ആർ. സുധാകരൻ നായർ എന്നിവർ പ്രസംഗിക്കുകയും ചെയ്തു.
