വൈക്കം; വൈക്കം സത്യാഗ്രഹത്തിന്റെ ശതാബ്ദി ആഘോഷങ്ങളില്‍ നിന്ന് എന്‍എസ്എസ് വിട്ടു നില്‍ക്കും. ശതാബ്ദി ആഘോഷിക്കുന്നതിന് വേണ്ടി രൂപീകരിച്ച സംഘാടക സമിതിയില്‍ നിന്നും എന്‍എസ്എസ് വിട്ടു നില്‍ക്കുമെന്ന് എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായര്‍ അറിയിച്ചു. സംഘാടകസമിതയുടെ ഭാഗമായി ആഘോഷങ്ങളില്‍ പങ്കുചേരാനുള്ള സാഹചര്യമല്ല ഇപ്പോള്‍ നിലനില്‍ക്കുന്നത്. എന്നാല്‍ നവോത്ഥാന സംരംഭങ്ങളില്‍ മന്നത്തു പത്മനാഭന്റെ പാത നായര്‍ സര്‍വീസ് സൊസൈറ്റി എന്നും പിന്തുടരുകതന്നെ ചെയ്യുമെന്നും സുകുമാരന്‍ നായര്‍ പറഞ്ഞു.
എന്‍എസ്എസ് ഒഴിഞ്ഞുമാറി നിന്നുകൊണ്ട് ശതാബ്ദി ആഘോഷത്തില്‍ അഭിമാനം കൊള്ളാനാണ് തീരുമാനിച്ചിരിക്കുന്നതെന്നും സുകുമാരന്‍ നായര്‍ വ്യക്തമാക്കി. അതേസമയം ആഘോഷങ്ങള്‍ വൈക്കത്ത് ഏപ്രില്‍ ഒന്നിന് വൈകിട്ട് 4.30ന് മുഖ്യമന്ത്രി പിണറായി വിജയനും തമിഴ്‌നാട് മുഖ്യമന്ത്രി എം കെ സ്റ്റാലിനും ചേര്‍ന്ന് ഉദ്ഘാടനം ചെയ്യും. വൈക്കം സത്യഗ്രഹം നടന്ന 603 ദിവസത്തെ അനുസ്മരിച്ചാണ് പരിപാടികള്‍. സംസ്ഥാനതല ഉദ്ഘാടനവും സമാപനവും വൈക്കത്ത് നടക്കും. ആഘോഷ പരിപാടികളുടെ നടത്തിപ്പിനായി മുഖ്യമന്ത്രി പിണറായി വിജയന്‍ ചെയര്‍മാനും മന്ത്രി സജി ചെറിയാന്‍ വര്‍ക്കിങ് ചെയര്‍മാനുമായി സംഘാടകസമിതി രൂപീകരിച്ചു.
