കോട്ടയം : കന്യാസ്ത്രീയെ ബലാത്സംഗം ചെയ്ത കേസില് ബിഷപ്പ് ഫ്രാങ്കോ കുറ്റവിമുക്തന്. ബിഷപ്പിനെതിരെ ചുമത്തിയ ഏഴു വകുപ്പുകളും നിലനില്ക്കില്ലെന്ന് കോടതി വ്യക്തമാക്കി. കോട്ടയം അഡീഷണല് സെഷന്സ് കോടതി ജഡ്ജി ജി ഗോപകുമാര് ആണ് വിധി പ്രസ്താവിച്ചത്. ബിഷപ്പിനെതിരായ തെളിവുകള് ഇല്ലെന്നും കോടതി വ്യക്തമാക്കി. കോടതി കുറ്റവിമുക്തനാക്കിയതോടെ ദൈവത്തിന് സ്തുതിയെന്ന് ബിഷപ്പ് പ്രതികരിച്ചു. ചിരിച്ചുകൊണ്ട് ബിഷപ്പ് പുറത്തേക്ക് വന്നു. 105 ദിവസത്തെ വിസ്താരത്തിനു ശേഷമാണ് കേസില് വിധി പ്രസ്താവിക്കുന്നത്. കുറവിലങ്ങാട്ടെ മിഷനറീസ് ഓഫ് ജീസസ് മഠത്തില്വെച്ച് 2014 മുതല് 2016 വരെയുള്ള കാലയളവില് കന്യാസ്ത്രീയെ ബിഷപ്പ് ഫ്രാങ്കോ 13 തവണ പീഡിപ്പിച്ചെന്നാണ് കേസ്. ബലാത്സംഗം, അധികാരം ഉപയോഗിച്ച് സ്ത്രീയെ ലൈംഗികമായി പീഡിപ്പിക്കല് തുടങ്ങിയവ ഉള്പ്പെടെ ഏഴു വകുപ്പുകള് പ്രകാരമുള്ള കുറ്റങ്ങളാണ് ബിഷപ്പിനെതിരേ ചുമത്തിയിരിക്കുന്നത്.
ആയിരം പേജുള്ള കുറ്റപത്രത്തില് മൂന്ന് ബിഷപ്പുമാരും 11 വൈദികരും 24 കന്യാസ്ത്രീകളും ഉള്പ്പടെ 84 സാക്ഷികളാണുള്ളത്. ഇതില് 33 പേരെയാണ് വിസ്തരിച്ചത്. പ്രതിപ്പട്ടികയില്നിന്ന് ഒഴിവാക്കണമെന്ന് ആവശ്യപ്പെട്ട് ഫ്രാങ്കോ മുളയ്ക്കല് നല്കിയ ഹര്ജി നേരത്തെ കോടതി തള്ളിയിരുന്നു. ഹര്ജി തുറന്ന കോടതിയില് കേള്ക്കണമെന്ന ഫ്രാങ്കോയുടെ ആവശ്യവും കോടതി നിരസിച്ചു. വിചാരണയില് നിന്ന് ഒഴിവാക്കണമെന്ന് ആവശ്യപ്പെട്ട് ബിഷപ്പ് ഫ്രാങ്കോ നല്കിയ വിടുതല് ഹര്ജി നേരത്തെ വിചാരണ കോടതിയും ഹൈക്കോടതിയും തള്ളിയിരുന്നു. ഇതിനെതിരെ നല്കിയ അപ്പീല് സുപ്രീംകോടതിയും തള്ളി. ഇതേത്തുടര്ന്നാണ് വിധി പുനഃപരിശോധിക്കണമെന്ന് ആവശ്യപ്പെട്ട് ഫ്രാങ്കോ വീണ്ടും സുപ്രീംകോടതിയില് ഹര്ജി നല്കിയെങ്കിലും പരിഗണിച്ചില്ല.
