തിരുവനന്തപുരം : ബി.എസ്.സി നഴ്സിങ് സർക്കാർ സീറ്റുകളിലേക്കുള്ള പ്രവേശനനടപടികൾ തിങ്കളാഴ്ചയോടെ എൽ.ബി.എസ് സെന്റർ ആരംഭിക്കും. സർക്കാർ കോളേജുകളിലെയും സ്വാശ്രയ, സഹകരണ മേഖലയിലെ കോളേജുകളിലെയും സി പാസിനു കീഴിലുള്ള കോളേജുകളിലെയും മെറിറ്റ് സീറ്റുകളിലേക്കുള്ള പ്രവേശനം നടത്താൻ മെഡിക്കൽ വിദ്യാഭ്യാസ വകുപ്പ് എൽ.ബി.എസിന് അനുമതി നൽകി.
ട്രയൽ അലോട്ട്മെന്റ് 11നും ആദ്യ അലോട്ട്മെന്റ് 15 നും പ്രസിദ്ധീകരിക്കാനാണ് ആലോചിച്ചിട്ടുള്ളതെന്ന് എൽ.ബി.എസ് ഡയറക്ടർ ഡോ.അബ്ദുൾറഹ്മാൻ അറിയിച്ചു. ആലപ്പുഴ, കോഴിക്കോട്, കോട്ടയം, തൃശ്ശൂർ, തിരുവനന്തപുരം, എറണാകുളം, പരിയാരം സർക്കാർ കോളേജുകളിലായി 478 സീറ്റുകളടക്കം 6235 നഴ്സിങ് സീറ്റുകളാണുള്ളത്. സർക്കാർ കോളേജുകളിലെ മുഴുവൻ സീറ്റിലും മറ്റു കോളേജുകളിലെ പകുതിസീറ്റിലുമാണ് എൽ.ബി.എസ് അലോട്ട്മെന്റ് നടത്തുന്നത്.
മാനേജ്മെന്റ് സീറ്റുകളിലേക്കുള്ള അലോട്ട്മെന്റുകൾ മാനേജ്മെന്റ് അസോസിയേഷനുകൾ നേരത്തേ ആരംഭിച്ചിരുന്നു. രണ്ട് അസോസിയേഷനുകളും രണ്ട് അലോട്ട്മെന്റുകൾവീതം നടത്തി. പ്രൈവറ്റ് നഴ്സിങ് കോളേജ് മാനേജ്മെന്റ് അസോസിയേഷനു കീഴിലെ കോളേജുകളിൽ 457 മാർക്കുവരെ ലഭിച്ചവർക്കാണ് ഇതുവരെ അലോട്ട്മെന്റ് ലഭിച്ചത്.
