കൊച്ചി: ഒരു മാസം മുന്നേ തോട്ടപ്പള്ളി ഹാര്ബറില് നിന്ന് 14.6 നോട്ടിക്കല് മൈല് ദൂരത്തു പുറംകടലില് മുങ്ങിയ എല്സ 3 എന്ന ചരക്ക് കപ്പല് കേരള തീരത്തിന് ഭീഷണിയാവുന്നു. കഴിഞ്ഞ മെയ് 25 നു മുങ്ങിയ കപ്പലിന്റെ ബങ്കറില് ഉള്ള 367 ടണ് സള്ഫര് കുറഞ്ഞ എണ്ണയും 84 ടണ് മറൈന് ഡീസലും ജൂലൈ 3 നു മുന്പ് നീക്കം ചെയ്യണം എന്നാണ് ഡയറക്ടര് ജനറല് ഓഫ് ഷിപ്പിങ്, കപ്പല് ഉടമസ്ഥരായ മെഡിറ്ററേനിയന് ഷിപ്പിങ് കമ്പനിക്കു അന്ത്യ ശാസനം നല്കിയിരുന്നത്. എന്നാല് എണ്ണ നീക്കം ചെയ്യാനുള്ള പ്രവര്ത്തനങ്ങള് നടത്തി വരികയാണെന്ന് ആണയിട്ടു പറഞ്ഞിരുന്ന കപ്പല് കമ്പനി, ഇതിനായി നിയോഗിച്ചിരുന്ന കമ്പനിയുമായുള്ള കരാര് അവസാനിപ്പിച്ചിരിക്കുകയാണ്. എണ്ണ നീക്കം ചെയ്യാനും കപ്പലിന്റെ അവശിഷ്ടങ്ങളും മാരക രാസ പദാര്ഥങ്ങള് അടങ്ങിയ കണ്ടെയ്നറുകള് നീക്കം ചെയ്യാനുമായി കൊണ്ട് വന്ന ടി ആന്ഡ് ടി സാല്വേജ് എണ്ണ കമ്പനി പണി നിര്ത്തി വച്ച് സ്ഥലം വിട്ടെന്ന് മെര്ക്കന്ടൈല് മറൈന് ഡിപ്പാര്ട്മെന്റ് അധികൃതര് പറയുന്നു.
നിലവില് മുങ്ങിയ കപ്പലില് നിന്ന് ആര്, എപ്പോള് എണ്ണയും പാരിസ്ഥിതിക ഭീഷണി ഉയര്ത്തുന്ന രാസ പദാര്ഥങ്ങളും നീക്കം ചെയ്യും എന്ന കാര്യം അനിശ്ചിതത്വത്തിലാണ്. ലോകത്തിലെ പ്രമുഖ സാല്വേജ് ടീമായ ടി ആന്ഡ് ടി സാല്വേജ്, കടലിന്റെ അടിത്തട്ടില് ഏകദേശം 54 മീറ്റര് ആഴത്തില് കിടക്കുന്ന എല്സ 3 യില് നിന്ന് എണ്ണ നീക്കം ചെയ്യാനും ചരക്കുകളും കപ്പലിന്റെ അവശിഷ്ടങ്ങളും നീക്കം ചെയ്യാനുമുള്ള സാങ്കേതിക പരിജ്ഞാനം ഇല്ല എന്ന് പറഞ്ഞാണ് പിന്മാറിയതെന്നു കപ്പല് ഉടമകള് ഡി ജി ഷിപ്പിംഗ് അധികൃതരെ അറിയിച്ചു. എന്നാല് ഇത് തൊടുന്യായം ആണെന്ന് ഈ രംഗത്തെ വിദഗ്ധര് പറയുന്നു. ലോകത്തിലെമ്പാടും മുങ്ങിയ കപ്പലില് നിന്ന് എണ്ണയും ചരക്കും നീക്കം ചെയ്തിട്ടുള്ള ടി ആന്ഡ് ടി സാല്വേജിനു സാങ്കേതിക പരിജ്ഞാനം ഇല്ല എന്ന വാദം ശരിയല്ല. ഇവര് ദക്ഷിണ ആഫ്രിക്കയില് നിന്നും സിംഗപ്പൂരില് നിന്നും മുങ്ങല് വിദഗ്ധരെ കൊണ്ട് വന്നു കപ്പലില് നിന്ന് എണ്ണ നീക്കം ചെയ്യാനുള്ള പ്രവര്ത്തനങ്ങള് ആരംഭിച്ചിരുന്നു. ഇതിനായി രണ്ടു ടഗ്ഗുകളും ഏര്പ്പെടുത്തി.
