ഓമല്ലൂർ: അധ്യാപക ദിനാചരണത്തിന്റെ ഭാഗമായി ആര്യഭാരതി ഹൈസ്കൂളിൽ മുൻ അധ്യാപകരെ ആദരിക്കുന്നതിനും അവരുടെ സേവനങ്ങളെ അനുസ്മരിക്കുന്നതിനുമായി പ്രത്യേക സംഗമം ‘ഗുരുസ്മരണ- ഒരു ചായക്കൂട്ട്” സംഘടിപ്പിച്ചു. ഇതിന്റെ ഭാഗമായി സ്കൂളിലെ മുൻ അധ്യാപക-അനദ്ധ്യാപകരെ സ്കൂളിലേക്ക് ക്ഷണിച്ച് പഴയകാല അധ്യാപന – പഠന അനുഭവങ്ങളും സ്കൂൾ ഓർമ്മകളും പങ്കുവെക്കുന്നതിനുള്ള അവസരം ഒരുക്കി. സ്കൂൾ ഹെഡ്മാസ്റ്റർ ശ്രീ ഫിബി അഗസ്റ്റസ് മാത്യു സ്വാഗതം ആശംസിച്ചു. മുൻ ഹെഡ്മാസ്റ്റർ ശ്രീ കോശി കൊച്ചു കോശി സംഗമത്തിന് അധ്യക്ഷത വഹിച്ചു. ശ്രീമതി ആൻമേരി ഷിനു സി. ടോം,ശ്രീമതി അനുമോൾ പി റ്റി എന്നിവർ പ്രസംഗിച്ചു.
പരിപാടിയിൽ പങ്കെടുത്ത മുൻ അധ്യാപകർ തങ്ങളുടെ സേവനകാലത്തെ അനുഭവങ്ങൾ വിദ്യാർത്ഥികളുമായും അധ്യാപകരുമായും പങ്കുവെച്ചു. പഴയകാല സ്കൂൾ ജീവിതത്തിലെ മറക്കാനാവാത്ത മുഹൂർത്തങ്ങൾ സദസിന് മുന്നിൽ അവതരിപ്പിച്ചപ്പോൾ അത് എല്ലാവർക്കും ഹൃദ്യമായ അനുഭവമായി. മുൻ അധ്യാപകരുടെ സാന്നിധ്യവും അനുഭവസമ്പത്തും പുതു തലമുറയ്ക്ക് പ്രചോദനം നൽകുന്നതായിരുന്നു. അധ്യാപകരുടെ നിസ്വാർത്ഥ സേവനങ്ങളെ ആദരിക്കുകയും വിദ്യാഭ്യാസ രംഗത്തെ അവരുടെ സംഭാവനകൾക്ക് നന്ദി രേഖപ്പെടുത്തുകയും ചെയ്തുകൊണ്ടാണ് പരിപാടി സമാപിച്ചത്. സ്റ്റാഫ് സെക്രട്ടറി ശ്രീമതി സുനിത മാത്യു ചടങ്ങിൽ കൃതജ്ഞത അറിയിച്ചു. തുടർന്ന് ഒരു ചായ സൽക്കാരവും സംഘടിപ്പിച്ചു.
