സലാല: ഒമാനിലെ സലാല- ഹൈമ റോഡിൽ കാർ നിയന്ത്രണം വിട്ട് മറിഞ്ഞുണ്ടായ അപകടത്തിൽ കണ്ണൂർ സ്വദേശിനി മരിച്ചു. കണ്ണൂർ താഴെചൊവ്വ തിലന്നൂർ ബർഷമഹലിൽ ഫാത്തിമത്ത് ഷഹന ആണ് മരിച്ചത്. 24 വയസായിരുന്നു. ഞായറാഴ്ച വൈകിട്ട് നടന്ന അപകടത്തിൽ ഷഹനയുടെ ഭർത്താവ് മുഹമ്മദ് ഷാനിദിനും (31) ഒപ്പമുണ്ടായിരുന്ന മുഹമ്മദ് അനസ് പൂളക്കലിനും (26) പരുക്കേറ്റു. ഇരുവരും സലാലയിലെ സുൽത്താൻ ഖാബൂസ് ആശുപത്രിയിൽ ചികിത്സയിലാണ്.
ഹൈമയിൽ സൈൻ ബോർഡ് ജോലികൾ പൂർത്തിയാക്കി തിരിച്ചുവരുന്നതിനിടെ ഇവർ സഞ്ചരിച്ചിരുന്ന കാർ നിയന്ത്രണം വിട്ട് മറിയുകയായിരുന്നു. മസ്കത്തിലെ സീബിൽ പ്രവർത്തിക്കുന്ന ‘ഫാൽക്കൺ ഗ്രാഫിക്സ്’ എന്ന സ്ഥാപനത്തിലെ ജീവനക്കാരാണ് പരുക്കേറ്റ മുഹമ്മദ് ഷാനിദും മുഹമ്മദ് അനസും. അടുത്തിടെയാണ് ഫാത്തിമത്ത് ഷഹന സന്ദർശന വിസയിൽ ഒമാനിലെത്തിയത്.
