കോഴിക്കോട് : കോയ റോഡ് ബീച്ചിലെ ആളൊഴിഞ്ഞ ഭാഗത്തുനിന്ന് ബൈക്കിലെത്തി യുവാവിനെ വെട്ടിക്കൊലപ്പെടുത്താന് ശ്രമിച്ച സംഘത്തിലെ ഒരാള്കൂടി പിടിയില്. ഫറോക്ക് പേട്ട എരഞ്ഞിക്കല് വീട്ടില് റംഷിഹാദിനെയാണ് (37) വെള്ളയില് ഇന്സ്പെക്ടര് ജി. ഗോപകുമാറും ടി. ജയകുമാറിെന്റ കീഴിലുള്ള സ്പെഷല് ആക്ഷന് ഫോഴ്സും (ഡന്സാഫ്) ചേര്ന്ന് അറസ്റ്റുചെയ്തത്. മുഖദാര് മരക്കാര്കടവ്പറമ്പ് ഷംസു (44) നേരത്തേ അറസ്റ്റിലായിരുന്നു.
ഫെബ്രുവരി 27ന് പുലര്ച്ച കോയ റോഡ് പള്ളിക്കു സമീപം സുഹൃത്തുമൊത്ത് സംസാരിച്ചു നില്ക്കവെ ബൈക്കിലെത്തിയ ഗുണ്ടാസംഘം മാരകായുധങ്ങളുമായി യുവാവിനെ വെട്ടാന് ശ്രമിക്കുന്നതിനിടയില് ഒഴിഞ്ഞുമാറി ഓടി രക്ഷപ്പെടുകയായിരുന്നു. അന്വേഷണ സംഘം നിരവധിയാളുകളെ ചോദ്യം ചെയ്യുകയും ശാസ്ത്രീയ രീതിയില് അന്വേഷണം നടത്തി പ്രതികളിലേക്ക് എത്തുകയും ഇവരുടെ വീടുകളില് പരിശോധന നടത്തുകയും ചെയ്തു.
പോലീസ് പിന്നാലെയുണ്ടെന്നറിഞ്ഞതോടെ ജില്ലക്ക് പുറത്തുപോയ പ്രതികളില് രണ്ടുപേര് തിരിച്ചെത്തി ഒളിവില് കഴിയവെയാണ് അറസ്റ്റിലായത്. ഷംസു നല്ലളം പോലീസ് സ്റ്റേഷനിലെ അടിപിടി കേസിലും റംഷിഹാദ് കൊണ്ടോട്ടി സ്റ്റേഷനിലെ സ്വര്ണ കവര്ച്ച കേസിലും പ്രതിയാണ്. ജില്ലയിലെ സ്വര്ണ കടത്ത് ഒറ്റ നമ്പര് ലോട്ടറി നടത്തുന്ന ഗുണ്ട നേതാവാണ് ആക്രമണത്തിന് പിന്നിലെന്നാണ് വിവരം.
തന്റെ സംഘത്തിലുള്ളവര്ക്ക് ലഹരി വസ്തുക്കള് നല്കിയാണ് ഇത്തരം കുറ്റകൃത്യത്തിലേക്ക് ഇയാള് ആളുകളെ റിക്രൂട്ട് ചെയ്യുന്നത്. സ്വര്ണ കള്ളക്കടത്ത് സംഘങ്ങള് തമ്മിലുള്ള കുടിപ്പകയാണോ ആക്രമണമെന്നും പോലീസ് സംശയിക്കുന്നുണ്ട്. ഡന്സാഫ് സബ് ഇന്സ്പെക്ടര് ഒ. മോഹന്ദാസ്, കെ. അഖിലേഷ്, ഹാദില് കുന്നുമ്മല്, ശ്രീജിത്ത് പടിയാത്ത്, ജിനേഷ് ചൂലൂര്, സുനൂജ് കാരയില്, അര്ജുന് അജിത്ത്, ഷഹീര് പെരുമണ്ണ, സുമേഷ് ആറോളി, വെള്ളയില് സ്റ്റേഷനിലെ റെനീഷ് മഠത്തില് എന്നിവരാണ് അന്വേഷണ സംഘത്തില് ഉണ്ടായിരുന്നത്.
