തിരുവനന്തപുരം : സര്ക്കാര് ആശുപത്രികളില് ഒ.പി ടിക്കറ്റുകള് വീട്ടിലിരുന്ന് ഓണ്ലൈനായി ബുക്ക് ചെയ്ത് ഡോക്ടറുടെ അപ്പോയ്ന്റ്മെന്റ് എടുക്കാന് കഴിയുന്ന ഇ ഹെല്ത്ത് സംവിധാനം എല്ലാവരും ഉപയോഗപ്പെടുത്തണമെന്ന് മന്ത്രി വീണാ ജോര്ജ്. കുടുംബാരോഗ്യ കേന്ദ്രങ്ങള് മുതല് മെഡിക്കല് കോളേജുകള് വരെയുള്ള ഇ ഹെല്ത്ത് സൗകര്യമുള്ള 303 ആശുപത്രികളില് ഓണ്ലൈന് ബുക്കിങ് വഴി നിശ്ചിത തീയതിയിലും സമയത്തും ഡോക്ടറുടെ സേവനം ലഭിക്കും.
ഒപി ടിക്കറ്റുകള്, ടോക്കണ് സ്ലിപ്പുകള് എന്നിവ പ്രിന്റെടുക്കാനും കഴിയും. ഇതിലൂടെ അവരരുടെ സൗകര്യമനുസരിച്ച് ഡോക്ടറെ കാണാനാവുകയും ആശുപത്രികളിലെ ക്യൂ ഒഴിവാക്കാനാവുകയും ചെയ്യും. സ്മാര്ട്ട് ഫോണും കംപ്യൂട്ടറും ഉപയോഗിച്ചും അക്ഷയ കേന്ദ്രങ്ങള് വഴിയും ഈ സേവനം ഉപയോഗപ്പെടുത്താവുന്നതാണെന്നും മന്ത്രി വ്യക്തമാക്കി. അതിനാല് ഈ സേവനം എല്ലാവരും ഉപയോഗപ്പെടുത്തണമെന്ന് മന്ത്രി ആവശ്യപ്പെട്ടു.
അപ്പോയ്ന്റ്മെന്റ് എങ്ങനെ എടുക്കാം?
വ്യക്തിക്ക് ലഭിച്ച തിരിച്ചറിയല് നമ്പറും പാസ്വേഡും ഉപയോഗിച്ചാണ് അപ്പോയിന്റ്മെന്റ് എടുക്കുന്നത്. ആദ്യം പോര്ട്ടലില് ലോഗിന് ചെയ്ത ശേഷം ന്യൂ അപ്പോയ്ന്റ്മെന്റ് ക്ലിക്ക് ചെയ്യുക. റഫറല് ആണെങ്കില് ആ വിവരം രേഖപ്പെടുത്തിയ ശേഷം ആശുപത്രി വിവരങ്ങളും ഡിപ്പാര്ട്മെന്റും തെരഞ്ഞെടുക്കുക. തുടര്ന്ന് അപ്പോയ്ന്റ്മെന്റ് വേണ്ട തീയതി തിരഞ്ഞെടുക്കുമ്പോള് ആ ദിവസത്തേക്കുള്ള ടോക്കണുകള് ദൃശ്യമാകും. സൗകര്യപ്രദമായ സമയമനുസരിച്ചുള്ള ടോക്കണ് എടുക്കാം. ടോക്കണ് വിവരങ്ങള് എസ്എംഎസ് ആയും ലഭിക്കും. ഇത് ആശുപത്രിയില് കാണിച്ചാല് മതിയാകും. സംശയങ്ങള്ക്ക് ദിശ 104, 1056, 0471 2552056, 2551056 എന്നീ നമ്പറുകളില് വിളിക്കാം
ആദ്യം യുണീക്ക് ഹെല്ത്ത് ഐഡി
ഇ ഹെല്ത്ത് വഴിയുള്ള സേവനങ്ങള് ലഭിക്കുവാന് ആദ്യം തിരിച്ചറിയല് നമ്പര് സൃഷ്ടിക്കണം. അതിനായി https://ehealth.kerala.gov.in എന്ന പോര്ട്ടലില് രജിസ്റ്റര് ലിങ്ക് ക്ലിക്ക് ചെയ്ത് ആധാര് നമ്പര് നല്കണം. തുടര്ന്ന് ആധാര് രജിസ്റ്റര് ചെയ്ത നമ്പറില് ഒടിപി വരും. ഇതു നല്കിയാല് ഓണ്ലൈന് വ്യക്തിഗത ആരോഗ്യ തിരിച്ചറിയല് നമ്ബര് ലഭ്യമാകും. ആദ്യതവണ ലോഗിന് ചെയ്യുമ്പോള് ഇത്തരത്തിലുള്ള 16 അക്ക വ്യക്തിഗത ആരോഗ്യ തിരിച്ചറിയല് നമ്പറും പാസ്വേഡും മൊബൈലില് മെസേജായി ലഭിക്കും. ഇത് സൂക്ഷിച്ചു വെയ്ക്കണം. ഇതുപയോഗിച്ച് ആശുപതികളിലേക്കു നിശ്ചിത തീയതിയിലും സമയത്തും അപ്പോയ്ന്റ്മെന്റ് എടുക്കാം.
