പത്തനംതിട്ട : ഓപ്പറേഷൻ തൂഫാൻ പദ്ധതിയുടെ ഭാഗമായി ജില്ലയിലെ സ്കൂളുകളിൽ ജനമൈത്രി പോലീസിന്റെയും സ്റ്റുഡന്റ് പോലീസ് കേഡറ്റ് പദ്ധതിയുടെയും നേതൃത്വത്തിൽ വിവിധ പരിപാടികൾ സംഘടിപ്പിച്ചു. ജില്ലാ പോലീസ് മേധാവി R ആനന്ദ് IPS ന്റെ നിർദ്ദേശാനുസരണം ജില്ലയിലെ വിവിധ സ്കൂളുകളിൽ ലഹരി വിരുദ്ധ സന്ദേശവുമായി കൂട്ടയോട്ടം റാലികൾ ഫുട്ബോൾ മത്സരങ്ങൾ എന്നിവ സംഘടിപ്പിച്ചു. പന്തളം ജനമൈത്രി പോലീസിന്റെയും സ്റ്റുഡന്റ് പോലീസ് പദ്ധതിയുടെയും നേതൃത്വത്തിൽ കൂട്ടയോട്ടം സംഘടിപ്പിച്ചു. തണ്ണിത്തോട് ജനമൈത്രി പോലീസിന്റെയും സ്റ്റുഡൻസ് പോലീസിന്റെയും ജൂനിയർ റെഡ്ക്രോസ്, ലിറ്റിൽ കൈറ്റ്സ് തുടങ്ങിയവയുടെയും സഹകരണത്തോടെ മുന്നൂറോളം കുട്ടികളെ പങ്കെടുപ്പിച്ചുകൊണ്ട് കാവിൽ ജംഗ്ഷൻ മുതൽ തണ്ണിത്തോട് മൂഴി വരെ ലഹരി വിരുദ്ധ റാലി നടത്തി.
കൂടൽ ജനമൈത്രി പോലീസിന്റെയും സ്റ്റുഡന്റ് പോലീസ് പദ്ധതിയുടെയും നേതൃത്വത്തിൽ മാങ്കോട് ഗവൺമെന്റ് സ്കൂളിൽ ലഹരി വിരുദ്ധ സന്ദേശവുമായി ഫുട്ബോൾ മത്സരങ്ങൾ സംഘടിപ്പിച്ചു. കർശനമായ പരിശോധനകളും നിയമ നടപടികളും തുടരുന്നതിനിടെ ലഹരിക്കെതിരെയുള്ള പോരാട്ടത്തിൽ വിദ്യാർത്ഥികളുടെയും യുവജനങ്ങളുടെയും പങ്കാളിത്തം ഉറപ്പുവരുത്തേണ്ടത് അത്യാവശ്യമാണെന്നും അതിനായി ഇത്തരം പ്രചാരണ പരിപാടികൾ ജില്ലാ പോലീസിന്റെ നേതൃത്വത്തിൽ തുടർന്നും സംഘടിപ്പിക്കുമെന്നും ജില്ലാ പോലീസ് മേധാവി അറിയിച്ചു.
