തിരുവനന്തപുരം : സംസ്ഥാനത്ത് ലഹരിമാഫിയയെ തുരത്തുന്നതിനായി സർക്കാർ നടപ്പാക്കുന്ന ‘ഓപ്പറേഷൻ തൂഫാൻ’ നടപടികൾക്ക് പൂർണ പിന്തുണ പ്രഖ്യാപിച്ച് നടൻ ജോയ് മാത്യു. സിനിമാ മേഖലയിലെ കാരവനുകളിലും പരിശോധന നടത്തുമെന്ന ആഭ്യന്തരമന്ത്രി രമേശ് ചെന്നിത്തലയുടെ പ്രസ്താവനയോട് പ്രതികരിക്കവെ എംഎൽഎ ഹോസ്റ്റലുകളിലും പരിശോധന നടത്തണമെന്നും അദ്ദേഹം ആവശ്യപ്പെട്ടു. താൻ പ്രവർത്തിച്ച സിനിമാ സെറ്റുകളിൽ കാരവനുകളുടെ ഉപയോഗം സുതാര്യമായിരുന്നുവെന്നും, കാരവനുകളെ ചുറ്റിപ്പറ്റി പ്രചരിക്കുന്ന ചില കഥകൾ അതിശയോക്തിപരമാണെന്നും ജോയ് മാത്യു പറഞ്ഞു. എന്നാൽ ഒറ്റപ്പെട്ട ചില സംഭവങ്ങൾ ഉണ്ടായിരിക്കാമെന്ന സാധ്യതയും അദ്ദേഹം തള്ളിക്കളഞ്ഞില്ല. ലഹരിവിരുദ്ധ പരിശോധനകൾ ഒരു മേഖലയിലേക്ക് മാത്രം ഒതുക്കാതെ വ്യാപകമാക്കണമെന്നും അദ്ദേഹം കൂട്ടിച്ചേർത്തു.
സിനിമാ മേഖലയിൽ ഉപയോഗിക്കുന്ന കാരവനുകളെ മാത്രമാണോ മന്ത്രി ഉദ്ദേശിച്ചതെന്ന് ചോദിച്ച ജോയ് മാത്യു, വിവിധ മേഖലകളിൽ കാരവനുകൾ ഉപയോഗിക്കുന്നുണ്ടെന്ന് ചൂണ്ടിക്കാട്ടി. സിനിമാ പ്രവർത്തകരുടെ കാരവനുകളിൽ പരിശോധന നടത്തുന്നതിനെ സ്വാഗതം ചെയ്യുന്നുവെന്നും ഏത് കാരവനും പരിശോധിക്കാമെന്നും അദ്ദേഹം വ്യക്തമാക്കി. സിനിമാ മേഖലയിലെ കാരവനുകളിൽ പരിശോധനയ്ക്ക് തയ്യാറാകുന്ന സർക്കാർ എംഎൽഎ ഹോസ്റ്റലുകളിലും സമാനമായ പരിശോധനകൾ നടത്താൻ തയ്യാറാകണമെന്നും ജോയ് മാത്യു ആവശ്യപ്പെട്ടു. ചില രാഷ്ട്രീയ പ്രവർത്തകർ ലഹരിക്ക് അടിമകളാണെന്ന് മുൻപ് എംഎൽഎ ജി. സുധാകരൻ തന്നെ പരസ്യമായി പറഞ്ഞ കാര്യവും അദ്ദേഹം ഓർമിപ്പിച്ചു.
