തിരുവനന്തപുരം : കേരളത്തില് ബിജെപി വളരാത്തത് എന്തെന്ന ചോദ്യത്തിന് സംസ്ഥാനത്തെ സാക്ഷരതയും വിദ്യാഭ്യാസവും ചൂണ്ടിക്കാട്ടി ഒ രാജഗോപാല് എംഎല്എ. കേരളത്തില് പാര്ട്ടി പതിയെ വളര്ന്നു കൊണ്ടിരിക്കുകയാണ് എന്നും അദ്ദേഹം പറഞ്ഞു. ഒരു മാധ്യമത്തിന് നല്കിയ
അഭിമുഖത്തിലാണ് ഒ. രാജഗോപാല് ഇങ്ങനെ പറഞ്ഞത്.
കേരളം പ്രത്യേകതയുള്ള സംസ്ഥാനമാണ്. ഇവിടെ രണ്ടു മൂന്നു വലിയ ഘടകങ്ങളുണ്ട്. കേരളത്തില് 90 ശതമാനമാണ് സാക്ഷരത. അവര് ചിന്തിക്കുന്നു. അവര് സംവാദത്തില് ഏര്പ്പെടുന്നു. ഇത് വിദ്യാസമ്പന്നരായ ജനങ്ങളുടെ സ്വഭാവമാണ്. ഇത് ഒരു കാര്യം. രണ്ടാമത്തെ പ്രത്യേകത, സംസ്ഥാനത്ത് 55 ശതമാനം ഹിന്ദുക്കളും 45 ശതമാനം ന്യൂനപക്ഷങ്ങളുമാണ്. അതുകൊണ്ടു തന്നെ ആ വശം ഓരോ കണക്കുകൂട്ടലിലും വരുന്നുണ്ട്. അതു കൊണ്ടാണ് കേരളത്തെ മറ്റു സംസ്ഥാനങ്ങളോട് താരതമ്യം ചെയ്യാന് കഴിയാത്തത്. ഇവിടെ സാഹചര്യങ്ങള് വ്യത്യസ്തമാണ്. എന്നാല് ഞങ്ങള് പതിയെ, ക്രമാനുഗതമായി വളര്ച്ച കൈവരിക്കുന്നുണ്ട്’ – രാജഗോപാല് പറഞ്ഞു.
ത്രിപുരയിലും ഹരിയാനയിലും കളംപിടിച്ച ബിജെപി കേരളത്തില് രാഷ്ട്രീയ ഇടം കണ്ടെത്താത്തത് എന്തു കൊണ്ടാണ് എന്ന ചോദ്യത്തിനായിരുന്നു രാജഗോപാലിന്റെ മറുപടി.
നേമത്തെ മത്സരത്തെക്കുറിച്ചുള്ള ചോദ്യത്തിന് ആരോഗ്യകാരണങ്ങള് മൂലമാണ് മാറിനില്ക്കുന്നത്, ഇപ്പോള് 93 വയസ്സായി, കുമ്മനം രാജശേഖരന് ജയിക്കുമെന്നാണ് പ്രതീക്ഷ എന്നായിരുന്നു അദ്ദേഹത്തിന്റെ മറുപടി. കെ മുരളീധരന് വന്നതോടെ മണ്ഡലം ത്രികോണ മത്സരത്തിന് സാക്ഷ്യം വഹിക്കും. എന്നാല് ദേശീയ തലത്തിലും സംസ്ഥാന തലത്തിലും കോണ്ഗ്രസിന്റെ പ്രതിച്ഛായ ദുര്ബലമായിക്കൊണ്ടിരിക്കുകയാണ്- അദ്ദേഹം ചൂണ്ടിക്കാട്ടി.
മുഖ്യമന്ത്രി പിണറായി വിജയന് കാര്യങ്ങള് കൈകാര്യം ചെയ്യാന് അറിയാം. അദ്ദേഹം കുറച്ചേ സംസാരിക്കൂ. എന്നാല് ലക്ഷ്യം നിറവേറ്റും. അദ്ദേഹത്തിന്റെ മേന്മകള് നിഷേധിക്കാനാവില്ല. സത്യം അംഗീകരിച്ചേ മതിയാകൂ എന്നും ഒ രാജഗോപാല് പറഞ്ഞു.