കൊച്ചി: ലോക ടൂറിസം ദിനമായ സെപ്റ്റംബർ 27 നോട് അനുബന്ധിച്ച് ഹിൽ ഇന്റഗ്രേറ്റഡ് ഡെവലപ്മെന്റ് ഫൗണ്ടേഷന്റെ(ഹിൽഡെഫ് ) ആഭിമുഖ്യത്തിൽ സെപ്റ്റംബർ 27 മുതൽ ഒക്ടോബർ 27 വരെ ഒരു മാസം നീണ്ടുനിൽക്കുന്ന”എന്റെ നാട് എന്റെ സൗന്ദര്യം എന്റെ നാടിന് ഒരു ക്ലിക്ക്” എന്ന പേരിൽ സെൽഫി മത്സരം സംഘടിപ്പിക്കുന്നു. ഏതൊരാൾക്കും കേരളത്തനിമയുള്ള ഏത് വിഷയവും പശ്ചാത്തലമാക്കി സെൽഫികൾ എടുത്ത് ഹിൽഡെഫിന്റെ ഇൻസ്റ്റഗ്രാം, ഫേസ്ബുക് പേജിൽ ടാഗ് ചെയ്യാം. ഫോട്ടോഗ്രാഫി വിദഗ്ധർ അടങ്ങുന്ന സമിതിയാണ് വിജയികളെ തിരഞ്ഞെടുക്കുന്നത്. എം.പി.മാർ, എം.എൽ.എ.മാർ രാഷ്ട്രീയ-സാമൂഹ്യ-സാംസ്കാരിക രംഗത്ത് പ്രവർത്തിക്കുന്നവരുടേയും പങ്കാളിത്തം ഉറപ്പുവരുത്തുന്നുണ്ട്. വിജയികൾക്ക് സമ്മാനമായി ആകർഷകമായ ടൂറിസം പാക്കേജുകൾ ലഭിക്കും.
ഹിൽഡെഫിന്റെ യുവസാമൂഹിക പ്രവർത്തകരാണ് പരിപാടികൾക്ക് നേതൃത്വം നൽകുന്നത്. ടൂറിസവുമായി ബന്ധപ്പെട്ട് പ്രവർത്തിക്കുന്ന ഏതൊരാൾക്കും പ്രസ്തുത പരിപാടിയിൽ പങ്കാളികളാകാം. തനതായ കേരള സംസ്കാരത്തെ ലോക ശ്രദ്ധയിലെത്തിക്കുക, പ്രളയവും കൊറോണയും തളർത്തിയ കേരളത്തിലെ ടൂറിസം മേഖലയെ പുനരുജ്ജീവിപ്പിക്കുക, ടൂറിസം മേഖല ഉപജീവനമാക്കിയവർക്ക് പുത്തൻ ഉണർവേകുക, തുടങ്ങിയവയാണ് ഹിൽഡെഫ് ലക്ഷ്യവയ്ക്കുന്നത്. ടൂറിസം ഭൂപടത്തിൽ ഇടംപിടിക്കാത്ത നമ്മുടെ ഗ്രാമീണഭംഗികൾ ലോകത്തെ പരിചയപ്പെടുത്തുക വഴി ഇക്കോ ടൂറിസം, ഹിൽ ടൂറിസം, അഡ്വെൻച്വർ ടൂറിസം, മെഡിക്കൽ ടൂറിസം, സ്പോർട്സ് ടൂറിസം തുടങ്ങിയ മേഖലകളിൽ പുതിയ അവസരങ്ങളും തൊഴിലിടങ്ങളും സൃഷ്ടിക്കാനാകും.
സെപ്റ്റംബർ 27ന് രാവിലെ 11 മണിക്ക് ചരിത്രപ്രസിദ്ധമായ മഹാരാജാസ് കോളേജ് അങ്കണത്തിൽ പ്രിൻസിപ്പാൾ ഡോ. വി.എസ്.ജോയ് “എന്റെ നാട് എന്റെ സൗന്ദര്യം എന്റെ നാടിന് ഒരു ക്ലിക്ക്’ എന്ന സെൽഫി മത്സരം ഉദ്ഘാടനം ചെയ്യും.
പത്രസമ്മേളനത്തിൽ കോ -കോഡിനേറ്റർസ് ആയ ആശ എസ്. നായർ മേഘ്ന ജോക്കബ്. പി, കൺവീനേർസ് ആയ ഹന്ന അലക്സാന്ഡര് ടീന പ്രിൻസ് ക്രിസ്റ്റീന സജി, പി.ആർ.ഒ, ഗായത്രി രാജൻ എന്നിവർ പങ്കെടുത്തു.
