കൊച്ചി : സെമിത്തേരി ഇരുവിഭാഗങ്ങള്ക്കും ഉപയോഗിക്കാമെന്ന സര്ക്കാര് തീരുമാനത്തിനെതിരെ ഓര്ത്തഡോക്സ് സഭ ഹൈക്കോടതിയില്. സെമിത്തേരി ഇരുവിഭാഗങ്ങള്ക്കും ഉപയോഗിക്കാമെന്ന സര്ക്കാര് തീരുമാനത്തിനെതിരെ ഓര്ത്തഡോക്സ് സഭ നേരത്തെ ഹര്ജി നല്കിയിരുന്നു. ഈ ഹര്ജിയിലാണ് കോടതി സര്ക്കാരിന് നോട്ടീസ് അയച്ചത്. നിയമസഭ തിരഞ്ഞെടുപ്പ് അടുത്തിരിക്കുന്ന സമയത്താണ് ഓര്ത്തഡോക്സ് സഭ ഇത്തരത്തിലൊരു നീക്കം നടത്തിയിരിക്കുന്നത്. ഇരുവിഭാഗങ്ങള്ക്കും സെമിത്തേരികള് ഉപയോഗിക്കാമെന്ന ഓര്ഡിനന്സ് കഴിഞ്ഞ വര്ഷമായിരുന്നു സര്ക്കാര് പുറത്തിറക്കിയത്.
പിന്നീട് അത് നിയമമാക്കുകയായിരുന്നു. ആ നിയമം ഭരണഘടനാ വിരുദ്ധമാണെന്ന് ആരോപിച്ചാണ് ഓര്ത്തഡോക്സ് സഭ ഹൈക്കോടതിയിലെത്തിയിരിക്കുന്നത്.ജസ്റ്റിസ് പി.വി ആശയാണ് ഈ ഹര്ജി ഫയലില് സ്വീകരിച്ചു കൊണ്ട് സംസ്ഥാന സര്ക്കാരടക്കമുള്ള എതിര് കക്ഷികള്ക്ക് നോട്ടീസ് അയച്ചത്. ഈ മാസം 17നാണ് ഹര്ജി വീണ്ടും കോടതിയുടെ പരിഗണനയില് വരുന്നത്. സംസ്ഥാന സര്ക്കാരിന്റെ നിയമനിര്മ്മാണം സുപ്രീം കോടതി വിധി മറികടക്കാനുള്ള നീക്കമാണെന്നാണ് ഓര്ത്തഡോക്സ് സഭ പറയുന്നത്.
