തിരുവനന്തപുരം : യാക്കോബായ – ഓര്ത്തഡോക്സ് സഭകള് തമ്മിലുള്ള പള്ളിത്തര്ക്കങ്ങളുടെ പശ്ചാത്തലത്തില് അനുരഞ്ജന ചര്ച്ചകള് നടത്താനൊരുങ്ങി സംസ്ഥാന സര്ക്കാര്. ഈ മാസം 10-ന് ഇരുവിഭാഗത്തേയും സര്ക്കാര് ചര്ച്ചയ്ക്ക് വിളിച്ചു.
ഇരുസഭകളും തമ്മിലുള്ള പള്ളിത്തര്ക്കം ഒരു ക്രമസമാധാന പ്രശ്നമായി ഉയര്ന്ന സാഹചര്യത്തിലാണ് സര്ക്കാരിന്റെ അനുനയ നീക്കം.
നേരത്തെ സുപ്രീംകോടതി വിധി വന്നതിന് ശേഷം പള്ളികള് സമവായത്തിലൂടെ വിട്ടുനല്കുന്നതിന് മന്ത്രിതല സമിതിയുടെ നേതൃത്വത്തില് നീക്കങ്ങള് നടത്തിയിരുന്നു. എന്നാല് ഓര്ത്തഡോക്സ് സഭ ചര്ച്ചയ്ക്ക് സന്നദ്ധരായിരുന്നില്ല. സുപ്രീംകോടതി വിധി നടപ്പാക്കണമെന്ന നിലപാടില് അവര് ഉറച്ച് നിന്നു.
കോടതി വിധി നടപ്പാക്കാനുള്ള ബാധ്യത സര്ക്കാറിനുള്ളപ്പോള് തന്നെ യാക്കോബായ സഭയില് നിന്നുയരുന്ന പ്രതിഷേധം അവഗണിക്കാനാവത്ത സ്ഥിതിയാണുള്ളത്. പള്ളി ഏറ്റെടുക്കാനുള്ള പോലീസ് നടപടികള്ക്കെതിരെ യാക്കോബായ സഭ സര്ക്കാരിനെതിരെ കടുത്ത വിമര്ശനം നടത്തിയിരുന്നു. സര്ക്കാര് ചര്ച്ചയ്ക്ക് വിളിച്ചിട്ടുണ്ടെങ്കിലും പങ്കെടുക്കുന്നത് സംബന്ധിച്ച് ഇരു സഭയും നിലപാട് പരസ്യമാക്കിയിട്ടില്ല.