മല്ലപ്പള്ളി : ചുങ്കപ്പാറ സെന്റ് ജോർജ് ഹൈസ്കൂൾ പടിയിൽ അപകട ഭീഷണി ഉയർത്തി വാഹനങ്ങളുടെ മരണപ്പാച്ചിൽ . സ്കൂളിന്റെ സമീപത്തെ പ്രധാന സ്റ്റോപ്പായതിനാൽ ബസുകളിലും മറ്റു സ്വകാര്യ വാഹനങ്ങളിലുമായി സ്കൂളിൽ എത്തുന്ന വിദ്യാർഥികൾ ഇറങ്ങുന്നത് ഇവിടെയാണ്. ഒരു വാഹനം യാത്രക്കാരെ ഇറക്കുന്നതിനായി നിർത്തിയാൽ മറുവശത്ത് നിന്നും എത്തുന്ന വാഹനങ്ങൾക്ക് കടന്നുപോകാൻ കഴിയാത്ത സ്ഥിതിയാണ്. ഇവിടെ ഗതാഗത കുരുക്ക് സൃഷ്ടിക്കുന്നതിനും ഇത് കാരണമാകുന്നു.
ചുങ്കപ്പാറ – ചാലാപ്പള്ളി റോഡിലേക്ക് കിടി കെട്ടിപ്പാറ റോഡ് സന്ധിക്കുന്ന ഭാഗം കൂടിയാണ് ഇവിടം. കുത്തനെയുള്ള ഇറക്കം ഇറങ്ങിവരുന്ന വാഹനങ്ങൾക്ക് പ്രധാന റോഡിൽ കൂടി വരുന്ന വാഹനങ്ങൾ കാണാൻ കഴിയാത്ത അവസ്ഥയാണ്. സ്കൂൾ വിദ്യാർഥികൾ ഇതിനിടയിലൂടെ വേണം നടന്നു പോകേണ്ടതും. അപകടസൂചനാ ബോർഡുകളോ സീബ്രാ ലൈനോ ഒന്നും ഇവിടെയില്ല. അപകട സാധ്യത നിലനിൽക്കുന്ന ഇവിടെ സിഗ്നൽ ലൈറ്റ് സ്ഥാപിച്ച് വാഹനങ്ങളുടെ വേഗത നിയന്ത്രിക്കാൻ അധികൃതരുടെ ഭാഗത്തുനിന്നും നടപടി ഉണ്ടാകണമെന്ന ആവശ്യം ശക്തമായിരിക്കുകയാണ്.
