ചെങ്ങന്നൂര് : പഞ്ചായത്ത് – നിയമസഭാ തെരഞ്ഞെടുപ്പുകളിൽ കോൺഗ്രസ്സ് സംഘടനയെ ശക്തമാക്കുവാനുള്ള ഭാരിച്ച ഉത്തരവാദിത്വമാണ് പുതിയ കെ.പി.സി.സി. ഭാരവാഹികൾക്കുള്ളതെന്ന് വൈസ് പ്രസിഡന്റ് പി സി.വിഷ്ണുനാഥ്.
കെ.പി.സി.സി വൈസ് പ്രസിഡൻറായി നിയമിച്ച ശേഷം ആദ്യമായി ചെങ്ങന്നൂരിലെത്തിയ അദ്ദേഹം മാധ്യമ പ്രവർത്തകരോട് സംസാരിക്കുകയായിരുന്നു. പാർട്ടി ഏൽപ്പിച്ച ഉത്തരവാദിത്വങ്ങൾ ഇതുവരെയും വളരെ ആത്മാർത്ഥയായി നിർവഹിക്കുവാൻ പരിശ്രമിച്ചിട്ടുണ്ട്. പുതിയ സ്ഥാനത്തും അങ്ങനെ തന്നെയായിരിക്കും. രാജ്യവ്യാപകമായി പൗരത്വ നിയമ ഭേദഗതിയടക്കമുള്ള വിഷയങ്ങളുമായി ബന്ധപ്പെട്ട് പ്രതിഷേധം നടക്കുമ്പോള് കോൺഗ്രസ്സിനു വലിയ ഉത്തരവാദിത്വങ്ങളാണ് നിർവഹിക്കുവാനുള്ളത്. അതുകൊണ്ട് തന്നെ ഈ പ്രത്യേക സന്ദർഭത്തിൽ പ്രസിഡന്റ് മുല്ലപ്പള്ളി രാമചന്ദ്രന്റെ നേതൃത്വത്തിൽ എല്ലാവരും ഒറ്റക്കെട്ടായി മുന്നാട്ടു പോകുമെന്നും പി സി.വിഷ്ണുനാഥ് പറഞ്ഞു.
