തിരുവനന്തപുരം: കെഎസ്ആര്ടിസി ബസില് യുവതിക്ക് നേരെ നഗ്നതാ പ്രദര്ശനം നടത്തിയ കേസില് അറസ്റ്റിലായ സവാദ് ജാമ്യം നേടി പുറത്തിറങ്ങിയപ്പോള് സ്വീകരണം നല്കിയ സംഭവത്തില് വിമര്ശനവുമായി വനിതാ കമീഷന് അധ്യക്ഷ പി സതീദേവി. പ്രതിക്ക് സ്വീകരണം നല്കിയ സംഭവം അസംബന്ധമാണെന്നും അതിജീവിതയെ അങ്ങേയറ്റം അപമാനിക്കുന്ന സംഭവമാണ് നടന്നതെന്നും സതീദേവി പ്രസ്താവനയില് പറഞ്ഞു. സോഷ്യല് മീഡിയയില് ഫോളോവേഴ്സിനെ കൂട്ടാനാണ് ഇങ്ങനൊരു പരാതി നല്കിയതെന്നാണ് സ്വീകരണം നല്കിയവരുടെ ആരോപണം.
സ്ത്രീകള്ക്കെതിരായ അതിക്രമങ്ങളെ റിപ്പോര്ട്ട് ചെയ്യുന്ന അതിജീവിതകള് എല്ലാക്കാലത്തും നേരിടുന്ന ഒരു വിഷയമാണ് വിക്റ്റിം ബ്ലെയ്മിങ്. അതിന്റെ മറ്റൊരു വകഭേദമാണ് ഈ ആരോപണവുമെന്ന് വനിത കമീഷന് വ്യക്തമാക്കി. കോടതി ജാമ്യം അനുവദിക്കുന്നത് കുറ്റവിമുക്തനാക്കുന്നതിന് തുല്യമല്ല. സാങ്കേതികവും അല്ലാത്തതുമായ പല കാരണങ്ങളാല് ജാമ്യം ലഭിക്കാം, ലഭിക്കാതിരിക്കാം. അത് പക്ഷേ, അതിജീവിതകളെ അപമാനിക്കുന്നതിനുള്ള ലൈസന്സല്ല- സതീദേവി പറഞ്ഞു.
