പാലക്കാട്: പാലക്കയത്ത് കൈക്കൂലി കേസില് അറസ്റ്റിലായ വില്ലേജ് അസിസ്റ്റന്റ് സുരേഷ് കുമാറില് നിന്ന് പണമടക്കമുള്ളവ വിജിലന്സ് കണ്ടെടുത്തു. 35 ലക്ഷം രൂപയും 17 കിലോ നാണയവുമാണ് ഇയാളില് നിന്ന് കണ്ടെത്തിയത്. ബാങ്ക് രേഖകള് പരിശോധിച്ചതില് 70 ലക്ഷം രൂപയുടെ നിക്ഷേപവും കണ്ടെത്തി. അദാലത്തില്നിന്ന് 2500 രൂപ കൈക്കൂലി വാങ്ങുന്നതിനിടെ ആണ് തിരുവനന്തപുരം സ്വദേശി വി സുരേഷ്കുമാര് അറസ്റ്റിലായത്.
പരിശോധനയില് പണത്തിന് പുറമെ കവര് പൊട്ടിക്കാത്ത 10 പുതിയ ഷര്ട്ടുകള്, മുണ്ടുകള്, കുടംപുളി ചാക്കിലാക്കിയത്, 10 ലിറ്റര് തേന്, പടക്കങ്ങള്, കെട്ടുക്കണക്കിന് പേനകള് എന്നിവയാണ് കണ്ടത്തിയത്. സുരേഷ് കുമാറിന്റെ മുറിയില് നിന്ന് കണ്ടെത്തിയ നാണയത്തുട്ടുകള് മാത്രം 9000 രൂപ വരും. മുറിയില് നിന്ന് ആകെ മുപ്പത്തിയഞ്ച് ലക്ഷത്തി ഏഴുപതിനായിരം രൂപയാണ് കണ്ടെത്തിയത്. കൈയില് ലക്ഷങ്ങള് ഉള്ളപ്പോഴും സുരേഷ് കുമാര് താമസിച്ചിരുന്നത് 2500 രൂപ മാസവാടകയുള്ള റൂമിലായിരുന്നു. സ്വന്തമായി കാറോ ഇരുചക്രവാഹനമോ ഇല്ല. പണം സ്വരുക്കൂട്ടിയത് സ്വന്തമായി വീട് വെക്കാനെന്നാണ് പ്രതിയുടെ കുറ്റസമ്മത മൊഴി. പുഴുങ്ങിയ മുട്ട,തേന്, കുടംപുളി, ജാതിക്ക തുടങ്ങി എന്തു നല്കിയാലും കൈക്കൂലിയായി വാങ്ങും. കൈക്കൂലി വാങ്ങാതെ ഒന്നും ചെയ്യുകയുമില്ല. കൈക്കൂലി വാങ്ങുന്നതിനിടെ അറസ്റ്റിലായ വില്ലേജ് ഫീല്ഡ് അസിസ്റ്റന്റ് വി.സുരേഷ്കുമാറിനെ പറ്റി നാട്ടുകാര് പറയുന്ന കാര്യമാണിത്. ഇയാളെ തൃശൂര് വിജിലന്സ് കോടതി 14 ദിവസത്തേക്കു റിമാന്ഡ് ചെയ്തു. ജൂണ് 7ന് കേസ് വീണ്ടും പരിഗണിക്കും.
