പള്ളിപ്പാട് : കവിയും പുല്ലാങ്കുഴല് വാദകനുമായ ബിനു എം പള്ളിപ്പാട് അന്തരിച്ചു. 47 വയസായിരുന്നു. പാന്ക്രിയാസിലെ രോഗബാധയെ തുടര്ന്ന് കോട്ടയം മെഡിക്കല് കോളജ് ആശുപത്രിയില് രണ്ടാഴ്ചയോളമായി ചികിത്സയിലായിരുന്നു. പ്രകൃതിയും ദേശവും കീഴാളശരീരങ്ങളും നൈസര്ഗികതയോടെ കവിതകളില് അവതരിപ്പിച്ചു. പ്രമേയങ്ങളിലും ആഖ്യാനത്തിലും രചനാ രീതിയിലും ഒന്നിനൊന്ന് വ്യത്യസ്തത പുലര്ത്താനും ശ്രമിച്ചു. കുമളിയിലാണ് താമസം. ഭാര്യ അമ്പിളി കെ ആര്.
1974ല് ഹരിപ്പാടിന് സമീപം പള്ളിപ്പാടാണ് ജനനം. അച്ഛന് മയിലന്, അമ്മ ചെല്ലമ്മ. പള്ളിപ്പാട് നടുവട്ടം ഹൈസ്കൂളിലും പരുമല ദേവസ്വം ബോര്ഡ് കോളജിലുമായി വിദ്യാഭ്യാസം പൂര്ത്തിയാക്കി. 1993 മുതല് ആനുകാലികങ്ങളില് കവിതകള് എഴുതുന്നു. കവിതയോടൊപ്പം പുല്ലാങ്കുഴലും അഭ്യസിച്ച അദ്ദേഹം ബാവുല് ഗായകര്ക്കൊപ്പം കേരളത്തിലും വടക്കുകിഴക്കന് സംസ്ഥാനങ്ങളിലും യാത്ര ചെയ്ത് സംഗീത പരിപാടികള് അവതരിപ്പിച്ചു.
2009ല് പുറത്തിറങ്ങിയ പാലറ്റ് ആണ് ആദ്യ കവിതാ സമാഹാരം. അവര് കുഞ്ഞിനെ തേടുമ്പോള് (2013), തമിഴ് കവി എന് ഡി രാജ്കുമാറിന്റെ സമ്പൂര്ണ കവിതകള്, ഒലിക്കാതെ ഇളവേനല് എന്ന ഇലങ്കന് പെണ് കവിതകള് എന്നിവയാണ് മറ്റു കവിതകള്. സി സി ചെല്ലപ്പയുടെ ജല്ലിക്കെട്ട് എന്ന നോവല് രാജ്കുമാറുമൊത്ത് മലയാളത്തിലേക്ക് മൊഴിമാറ്റി. എംജി, മദ്രാസ്, കേരള സര്വകലാശാലകള് അദ്ദേഹത്തിന്റെ കവിതകള് സിലബസില് ഉള്പ്പെടുത്തിയിട്ടുണ്ട്. ഓക്സ്ഫഡ് യൂണിവേഴ്സിറ്റി പുറത്തിറക്കിയ സൗത്ത് ഇന്ത്യന് ദളിത് ആന്തോളജിയിലും ബിനു എം പള്ളിപ്പാടിന്റെ കവിത ഇടംപിടിച്ചു.
