ആറന്മുള : പള്ളിയോടത്തില്ക്കയറി ഫോട്ടോ ഷൂട്ട് നടത്തിയ യുവതിയെയും സഹായിയെയും പോലീസ് അറസ്റ്റ് ചെയ്തു. തൃശൂര് ചാലക്കുടി സ്വദേശി നിമിഷ ബിജോ, പത്തനംതിട്ട പുലിയൂര് സ്വദേശി ഉണ്ണി എന്നിവരാണ് അറസ്റ്റിലായത്. പള്ളിയോട സംഘം നല്കിയ പരാതിയിലാണ് അറസ്റ്റ്.
വ്രതശുദ്ധിയോടുകൂടി മാത്രമേ പള്ളിയോടത്തില് കയറാന് പാടുള്ളൂ എന്നാണ് വിശ്വാസം. സ്ത്രീകള് പള്ളിയോടങ്ങളില് കയറാന് പാടില്ലെന്നുണ്ട്. കൂടാതെ പാദരക്ഷകള് ഉപയോഗിക്കാറുമില്ല. എന്നാല് ഫോട്ടോഷൂട്ട് നടത്തിയ നിമിഷ ഷൂസിട്ടാണ് പള്ളിയോടത്തില് കയറിയത്. ഓരോ പള്ളിയോടങ്ങളും അതാത് പള്ളിയോടക്കാരുടെ ഉടമസ്ഥതയിലാണ് ഉള്ളത്. ഇവരുടെ അനുമതിയില്ലാതെ പള്ളിയോടങ്ങളിലോ പുരയിലോ കയറാന് പാടില്ലെന്നാണ് രീതി.
