ചെങ്ങന്നൂർ : ശബരിമല തീർഥാടനകാലത്ത് ചെങ്ങന്നൂർ-പമ്പ സ്പെഷൽ സർവീസിലൂടെ കെഎസ്ആർടിസിക്ക് ഒരുകോടി രൂപ അധികവരുമാനം മുൻ വർഷത്തെക്കാൾ ലഭിച്ചതായി റിപ്പോർട്ടുകൾ. യാത്രക്കാരുടെയും ട്രിപ്പുകളുടെയും എണ്ണത്തിലും വർധനയുണ്ടായി. ഈ സീസണിൽ 7,93,01,679 രൂപയാണു വരുമാനമായി ലഭിച്ചത്. മുൻ വർഷം 6,90,58,970 രൂപ ലഭിച്ചസ്ഥാനത്താണിത്. കഴിഞ്ഞവർഷം 9,296 ട്രിപ്പുകൾ നടത്തിയെങ്കിൽ ഈ വർഷം 10,292 ട്രിപ്പുകളാണ് ഓടിച്ചത്. യാത്രക്കാരുടെ എണ്ണത്തിലും വലിയ വർധനയാണുണ്ടായത്. കഴിഞ്ഞവർഷം 4,67,349 തീർഥാടകരാണു കെഎസ്ആർടിസി ബസിനെ ആശ്രയിച്ചതെങ്കിൽ ഈ വർഷം 5,30,845 പേരാണു യാത്രചെയ്തത്.
ടിക്കറ്റു വരുമാനത്തിലുണ്ടായ വർധന കെഎസ്ആർടിസിയെ സംബന്ധിച്ചിടത്തോളം ആശ്വാസകരമാണ്. നിരക്കു കൂട്ടാതെയാണു 10,242,709 രൂപ അധികമായി ലഭിച്ചത്. കഴിഞ്ഞവർഷം 55 ബസുകളാണ് ഓടിച്ചതെങ്കിൽ ഈ വർഷം 65 ബസുകളാണ് സർവീസിനുണ്ടായിരുന്നത്.
