കോന്നി : കൊക്കാത്തോട്ടിലെ അനധികൃത നായ വളർത്തൽ കേന്ദ്രത്തിനെതിരെ അരുവാപ്പുലം ഗ്രാമ പഞ്ചായത്ത് വസ്തു ഉടമക്ക് നോട്ടീസ് നൽകി. വസ്തു ഉടമ വലൻചൂഴി ഇടവക്കൽ മേലെതിൽ ഷെരീഫിനാണ് നോട്ടീസ് നൽകിയത്. കേരള പഞ്ചായത്ത് രാജ് ആക്റ്റ് സെക്ഷൻ 232,1998 ലെ കേരള പഞ്ചായത്ത് രാജ് (പന്നികൾക്കും പട്ടികൾക്കും ലൈസൻസ് നൽകൽ) ചട്ടപ്രകാരമാണ് വസ്തു ഉടമക്ക് അരുവാപ്പുലം ഗ്രാമ പഞ്ചായത്ത് നോട്ടീസ് നൽകിയത്. ഈ വസ്തുവിൽ മാങ്കുളം സ്വദേശി ഷീജ മൻസിലിൽ അജാസ് ആണ് യാതൊരു മാനദണ്ഡങ്ങളും കൂടാതെ നായകളെ വളർത്തുന്നത്. തിരുവനന്തപുരം മുതൽ എറണാകുളം വരെയുള്ള ജില്ലകളിലെ പരുക്കേറ്റത് അടക്കമുള്ള നായകളെ ഇവിടെ എത്തിച്ചിട്ടുണ്ട്.
ഏതാണ്ട് എഴുപതോളം നായകളെ ഇവിടെ അധിവസിപ്പിച്ചിട്ടുണ്ട്.എന്നാൽ ഇവറ്റകൾക്ക് ആവശ്യമായ അടിസ്ഥാന സൗകര്യങ്ങൾ ഒരുക്കാതെ നായകളെ അഴിച്ചു വിടുന്നത് നാട്ടുകാർക്ക് ശല്യമാകുന്നെണ്ടെന്ന് കാണിച്ച് പ്രദേശവാസികൾ ഗ്രാമ പഞ്ചായത്തിന് പരാതി നൽകിയിരുന്നു. ഈ വിഷയത്തിൽ ഒന്നിലധികം പരാതികൾ ലഭിച്ചതിന്റെ അടിസ്ഥാനത്തിൽ പഞ്ചായത്ത് കമ്മിറ്റി വിഷയം ചർച്ച ചെയ്തതിന്റെ അടിസ്ഥാനത്തിൽ വിഷയത്തിൽ കഴമ്പുണ്ടെന്ന് കണ്ടെത്തുകയും വസ്തു ഉടമക്ക് പ്രവർത്തി നിർത്തി വെക്കാൻ നോട്ടീസ് നൽകുകയുമായിരുന്നു. എന്നാൽ താൻ വസ്തു നൽകുക മാത്രമാണ് ചെയ്തതെന്നും ഈ വിഷയത്തെ കുറിച്ച് അറിയില്ലായിരുന്നു എന്നും ഗ്രാമ പഞ്ചായത്തിന് വസ്തു ഉടമ മറുപടി നൽകിയിട്ടുണ്ടെന്നും ഗ്രാമ പഞ്ചായത്ത് അധികൃതർ അറിയിച്ചു.
