കോട്ടക്കല് : സമാന്തര ടെലിഫോണ് എക്സ്ചേഞ്ച് കേസുമായി ബന്ധപ്പെട്ട് കോട്ടക്കലില് പിടിയിലായ പ്രതിയുമായി പോലീസ് തെളിവെടുപ്പ് നടത്തി. കോട്ടക്കല് പുലിക്കോട് പുന്നക്കോട്ടില് സലീമിനെയാണ് വീട്ടില് എത്തിച്ച് തെളിവെടുപ്പ് നടത്തിയത്. അതിരപ്പള്ളി എസ്.എച്ച്.ഒ ഷിജുവിന്റെ നേതൃത്വത്തിലായിരുന്നു നടപടികള്. ബുധനാഴ്ച രാവിലെ പതിനൊന്നരയോടെ എത്തിയ അന്വേഷണ സംഘം രണ്ടു മണിക്കൂറോളം പരിശോധന നടത്തി.
എ.എസ്.ഐ സുനില്, സി.പി.ഒമാരായ ഷൈലജ, ജിജോ, പ്രവീണ് എന്നിവരും നടപടികള്ക്ക് നേതൃത്വം നല്കി. തൃശൂരില് നിന്നുമുള്ള സൈബര് വിങ്ങും അന്വേഷണ സംഘത്തിലുണ്ടായിരുന്നു. റിമാന്ഡിലായിരുന്ന പ്രതിയെ കഴിഞ്ഞ ദിവസമാണ് കസ്റ്റഡിയില് വാങ്ങിയത്. സെപ്റ്റംബര് 13ന് വീണ്ടും കോടതിയില് ഹാജരാക്കും.
കൊരട്ടി ഡിവൈ.എസ്.പി സന്തോഷ് കുമാറിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. തൃശൂര്, കോഴിക്കോട് സമാന്തര ടെലിഫോണ് എക്സ്ചേഞ്ചിെന്റ പ്രവര്ത്തനം നിയന്ത്രിച്ച പ്രധാനിയാണ് സലീമെന്നാണ് പോലീസ് പറയുന്നത്. അറസ്റ്റിലായ പ്രതി മറ്റു ചില കേന്ദ്രങ്ങളിലും എക്സ്ചേഞ്ച് പ്രവര്ത്തിപ്പിച്ചിരുന്നതായാണ് സൂചന. ഇവിടെയെല്ലാം തെളിവെടുപ്പ് പൂര്ത്തിയാക്കുമെന്ന് ഉദ്യോഗസ്ഥര് അറിയിച്ചു.
