തിരുവനന്തപുരം : പോലീസ് വാഹനത്തില് നിന്നും കണക്കില്പ്പെടാത്ത പണം കണ്ടെത്തിയ സംഭവത്തില് രണ്ട് പോലീസുകാര്ക്ക് സസ്പെന്ഷന്. പാറശാല സ്റ്റേഷനിലെ ഗ്രേഡ് എസ്ഐ ജ്യോതികുമാര്, ഡ്രൈവര് അനില് കുമാര് എന്നിവര്ക്കെതിരെയാണ് നടപടി. ഏപ്രില് ആറിന് ഇവര് സഞ്ചരിച്ച പോലീസ് വാഹനത്തിലെ ഡ്രൈവര് സീറ്റിന്റെ അടിയില് നിന്നും 13,960 രൂപ വിജിലന്സ് കണ്ടെത്തിയിരുന്നു.
ചുരുട്ടിയ നിലയില് 500, 200, 100 രൂപയുടെ നോട്ടുകളാണ് പിടിച്ചെടുത്തത്. രാത്രി റോഡ് പരിശോധനയ്ക്ക് ശേഷം വാഹനം തിരിച്ച് സ്റ്റേഷന് വളപ്പിലെത്തിയപ്പോഴായിരുന്നു വിജിലന്സ് പരിശോധന. ഈ പണം കൈക്കൂലിയായി വാങ്ങിയതാണെന്ന നിഗമനത്തിലാണ് ഇരുവരെയും സസ്പെന്ഡ് ചെയ്തത്.
