മണ്ണാര്ക്കാട്: സൈലന്റ് വാലി ദേശീയോദ്യാനത്തിന്റെ ചുറ്റും പരിസ്ഥിതി ലോല മേഖല പ്രഖ്യാപനം സംബന്ധിച്ച് ആശയകുഴപ്പം ചര്ച്ച ചെയ്യാന് മണ്ണാര്ക്കാട് യോഗം ചേര്ന്നു. അഡ്വ. എന്. ഷംസുദ്ദീെന്റ നേതൃത്വത്തിലാണ് വനം വകുപ്പ് ഉദ്യോഗസ്ഥരുടെയും ജനപ്രതിനിധികളുടെയും വിവിധ രാഷ്ട്രീയ പ്രതിനിധികളുടെയും യോഗം ചേര്ന്നത്. മേഖലയുടെ വിശദമായ കരട് രേഖ ലഭിച്ചിട്ടില്ലെന്നും വനം വകുപ്പ് നേരത്തേ സമര്പ്പിച്ച റിപ്പോര്ട്ടില് ജനവാസ മേഖലയില്ലെന്നും ബഫര് സോണ് മേഖലയായ വനഭൂമിക്ക് പുറത്ത് പരിസ്ഥിതി ലോല മേഖല വരുന്നില്ലെന്നും നിലവില് ആശങ്കപെടേണ്ടതില്ലെന്നും നിലവിലെ ബഫര് സോണ് മേഖല തന്നെയാണ് പരിസ്ഥിതി ലോല മേഖലക്കായി നിര്ദേശം വന്നിട്ടുള്ളതെന്നും ഉദ്യോഗസ്ഥര് പറഞ്ഞു.
കസ്തൂരി രംഗന് റിപ്പോര്ട്ടുമായി നിലവില് സൈലന്റ് വാലി പരിസ്ഥിതി ലോല മേഖല അതിര്ത്തി നിര്ണയ പ്രഖ്യാപനത്തിന് ബന്ധമില്ലെന്നും ഉദ്യോഗസ്ഥര് വിശദീകരിച്ചു. വനം വകുപ്പ് ഉദ്യോഗസ്ഥര് യോഗത്തില് അറിയിച്ചതനുസരിച്ച് ആശങ്ക വേണ്ടതില്ലെന്നും വിശദമായ കരട് രേഖ വന്നതിനുശേഷം ദോഷകരമായ വശങ്ങള് ഉണ്ടെങ്കില് വിപുലമായ പ്രത്യേക യോഗം ചേരാമെന്ന് അധ്യക്ഷത വഹിച്ച അഡ്വ. എന്. ഷംസുദ്ദീന് പറഞ്ഞു. സൈലന്റ് വാലി വൈല്ഡ് ലൈഫ് വാര്ഡന് ഖുറ ശ്രീനിവാസ് ഐ.എഫ്.എസ് മണ്ണാര്ക്കാട് ഡി.എഫ്.ഒ കെ.കെ. സുനില് കുമാര്, അസി. വൈല്ഡ് ലൈഫ് വാര്ഡന്മാരായ അജയ് ഘോഷ്, ആശ ലത, ജനപ്രതിനിധികളായ ഇ.കെ. രതി, റഫീഖ് പാറക്കോട്, വിവിധ കക്ഷി നേതാക്കളായ ഉണ്ണികൃഷ്ണന്, മൊയ്തീന്, കെ.ടി. തോമസ്, ദേവരാജ്, ബാലന് കക്കര, ടി.വി. രാജു, കെ.കെ. രാജന്, എം. വര്ഗീസ് പങ്കെടുത്തു.
