പാല : പാല എന്നും സ്വന്തമാണെന്ന് കേരളാ കോൺഗ്രസ് എം ചെയർമാൻ ജോസ് കെ മാണി. പാലായിൽ മത്സരിക്കുന്ന കാര്യം പാർട്ടി തീരുമാനിക്കും. ഇത്തവണ 13 സീറ്റിൽ പാർട്ടി മത്സരിക്കുമെന്നും ജോസ് കെ മാണി പറഞ്ഞു. നിലവിലെ എംഎൽഎമാരും മന്ത്രിമാരും മത്സരിക്കുന്ന കാര്യവും പാർട്ടി തീരുമാനിക്കും. നിലവിൽ തിരഞ്ഞെടുപ്പ് ചർച്ചകളിലേക്ക് കടന്നിട്ടില്ലെന്ന് ജോസ് കെ മാണി വ്യക്തമാക്കി.
പാലായിലെ വികസനം തടസ്സപ്പെടുത്തിയത് ആരാണെന്ന് പാലാക്കാർക്ക് അറിയാമെന്ന മാണി സി കാപ്പന്റെ പരാമർശത്തിനും ജോസ് കെ മാണി മറുപടി നൽകി. പാലായിൽ എന്തു വികസനം കൊണ്ടുവന്നെന്ന് മാണി സി കാപ്പൻ എംഎൽഎ വ്യക്തമാക്കണം. ഒരു ബൃഹത് പദ്ധതി പോലും പാലായിൽ കൊണ്ടുവന്നിട്ടില്ല. വാക്ക് തർക്കത്തിനില്ലെന്നും ജനങ്ങൾ ഇക്കാര്യങ്ങൾ വിലയിരുത്തട്ടെയെന്നും എന്നും ജോസ് കെ മാണി പറഞ്ഞു.
