പത്തനംതിട്ട: പത്തനംതിട്ട ജില്ലയില്‍ കോവിഡ് ബാധിതരില്‍ രോഗലക്ഷണങ്ങള്‍ ഉണ്ടാകാതെ രോഗം സ്ഥിരീകരിക്കുന്ന സാഹചര്യത്തില്‍ പ്രത്യേക സംഘം പഠനം തുടങ്ങി. നാല് ഡോക്ടര്‍മാരടങ്ങിയ സംഘമാണ് പഠനം നടത്തുന്നത്. പത്തനംതിട്ട ജില്ലക്ക് പുറത്തുള്ള ഇത്തരം കേസുകള്‍കളും പഠനത്തില്‍ ഉള്‍പ്പെടുത്തും.
ഡോക്ടര്‍മാരായ രശ്മി എം എസ്, നവീന്‍, ഗീതു മാത്യു, പാര്‍വതി തുടങ്ങിയ സംഘത്തിനൊപ്പം പുഷ്പഗിരി മെഡിക്കല്‍ കോളേജില്‍ നിന്ന് രണ്ട് മെഡിക്കല്‍ പി.ജി.വിദ്യാര്‍ഥികളും ഉണ്ട്.
കഴിഞ്ഞ ദിവസം മൂന്ന് പേര്‍ക്കാണ് പത്തനംതിട്ട ജില്ലയില്‍ രോഗലക്ഷണങ്ങള്‍ പ്രകടമാകാതെ രോഗ ബാധ സ്ഥിരീകരിച്ചത്. ഇതേ തുടര്‍ന്നാണ് ഇതിനെ കുറിച്ച്‌ പഠിക്കുന്നതിനായി ആരോഗ്യ വകുപ്പ് പ്രത്യേക പഠന സംഘത്തെ നിയോഗിച്ചത്. രോഗലക്ഷണങ്ങളോടെയും അല്ലാതെയും രോഗം സ്ഥിരീകരിച്ചവരുടെ ആരോഗ്യസ്ഥിതി, രോഗവ്യാപനം, ലക്ഷണങ്ങള്‍ പ്രകടമാക്കുന്നതിന് വേണ്ടിയുള്ള കാലയളവിലെ ഏറ്റക്കുറച്ചിലുകള്‍ തുടങ്ങിയ കാര്യങ്ങളെല്ലാം പഠനവിധേയമാക്കും.
നിലവിലുള്ള പൊതുജനാരോഗ്യ ജാഗ്രതാ സമിതിയെയാണ് പഠനത്തിനായി നിയോഗിച്ചിട്ടുള്ളത്. സംസ്ഥാനത്ത് രോഗ ലക്ഷണങ്ങള്‍ ഇല്ലാത്ത നിരവധി പേര്‍ക്ക് രോഗബാധ ഉണ്ടാകാനുള്ള സാധ്യത മുന്‍നിര്‍ത്തിയാണ് ആരോഗ്യവകുപ്പ് പഠനം നടത്താന്‍ തീരുമാനിച്ചത്.
