പത്തനംതിട്ട : പത്തനംതിട്ട – അഴൂരില് റോഡിന്റെ ഇരുവശങ്ങളും കാട് കയറി മൂടിയിട്ടും വെട്ടിത്തെളിക്കാന് നടപടി സ്വീകരിക്കാതെ പത്തനംതിട്ട നഗരസഭ. അഴൂരില് നിന്നും പൂങ്കാവിലേക്കും താഴൂര് കടവിലേക്കും പോകുന്ന റോഡിലാണ് കാടുകള് വളര്ന്ന് നില്ക്കുന്നത്. ഒരാള് പൊക്കത്തില് വളര്ന്ന കാടുകള് വാഹനയാത്രക്കാര്ക്കും കാല്നടയാത്രക്കാര്ക്കും ഒരുപോലെ ഭീഷണിയാവുകയാണ്. നഗരത്തില് പ്രധാന റോഡുകളില് പോലും നടപ്പാതകളിലെ കാടുകള് നീക്കം ചെയ്യാന് പത്തനംതിട്ട നഗരസഭ വിമുഖത കാട്ടുന്നുണ്ട്. സ്കൂള് കുട്ടികളും പ്രായമായവരും ഉള്പ്പെടെ കാടുകയറി കിടക്കുന്ന ഈ നടപ്പാതകളില് കൂടിയാണ് സഞ്ചരിക്കുന്നത്. റോഡിലെ വളവുകളില് കാടുകള് വളര്ന്ന് നില്ക്കുന്നത് വാഹനയാത്രക്കാരുടെ കാഴ്ചമറയ്ക്കുന്നതിനും കാരണമായി തീരുന്നു.
പലയിടത്തും ഇഴജന്തുക്കളുടെ ശല്യവും രൂക്ഷമാണ്. രാത്രി സമയങ്ങളില് പത്തനംതിട്ട നഗരത്തില് പലയിടത്തും വെളിച്ചമില്ലാത്തതിനാല് കാടുകയറിയ നടപ്പാതയിലൂടെയുള്ള യാത്ര ജനങ്ങള്ക്ക് അപകടം നിറഞ്ഞതാണ്. മാത്രമല്ല റോഡിന് ഇരുവശത്തും വളര്ന്നുനില്ക്കുന്ന കാടുകളും മുള്ളുകളും ആളുകള് നടന്നുപോകുമ്പോള് ശരീരത്തില് കൊള്ളുന്നുവെന്നും പരാതിയുണ്ട്. നാടെങ്ങും മഴക്കാലപൂര്വ്വ ശുചീകരണ പ്രവര്ത്തനങ്ങള് വ്യാപകമായി നടക്കുമ്പോഴും ഇതൊന്നും നടപ്പാക്കാതെയാണ് പത്തനംതിട്ട നഗരസഭ ഭരണസമിതി മുന്നോട്ട് പോകുന്നത്.
