പത്തനംതിട്ട : പുതിയ കെട്ടിടം പണി പൂര്ത്തിയായിട്ടും പത്തനംതിട്ട ബസ്റ്റാന്ഡ് വെറും നോക്കുകുത്തി. അഴുക്ക്ചാലിന്റെ നിര്മ്മാണം ഇഴയുന്നു. പലതുവണ ഉദ്ഘാടനം നടത്തി എങ്കിലും പുതിയ ബസ് ടെര്മിനലില് നിന്ന് കെഎസ്ആര്ടിസി സര്വീസുകള് തുടങ്ങാന് ഇനിയും സാധിച്ചിട്ടില്ല. കെട്ടിടം പൂര്ണതോതില് പ്രവര്ത്തന സജ്ജമാണെങ്കിലും ബസ് സ്റ്റേഷന് പരിസരത്തെ ഓട നിര്മാണം ഇനിയും പൂര്ത്തിയായിട്ടില്ല. സ്റ്റാന്ഡിലേക്ക് ബസ് കയറുന്ന ഭാഗം മുതല് ഓഫിസ് വരെ 5000 ചതുരശ്ര അടി ഭാഗം ലോക്ക്കട്ട ഇട്ട് യാഡ് നിര്മിച്ചിട്ടുണ്ട്. എംഎല്എ ഫണ്ട് ഉപയോഗിച്ചാണ് യാഡ് നിര്മിച്ചത്. മന്ത്രി വീണാ ജോര്ജ് പ്രത്യേക താല്പര്യമെടുത്ത് കെഎസ്ആര്ടിസി എംഡിയെക്കൊണ്ട് ഉന്നതതല യോഗം വിളിച്ചാണ് നിര്മാണം പൂര്ത്തിയാക്കിയത്.
യാഡിന്റെ പണിയും വേഗം തീര്ത്തു. മാലിന്യ സംസ്കരണം, ഓട നിര്മാണം തുടങ്ങിയ പണികള് ഇഴയുന്നതാണ് സര്വീസ് തുടങ്ങാന് കാലതാമസം വരുത്തുന്നതെന്ന് പറയപ്പെടുന്നു. ജില്ലാ ആസ്ഥാനത്തെ ബസ് സ്റ്റാന്ഡ് എന്ന പ്രത്യേക പരിഗണന നിര്മാണത്തില് കാണുന്നില്ല. ബസ് ടെര്മിനല് കെട്ടിടം റോഡിന് അഭിമുഖമായി വരുന്ന ഭാഗത്ത് ഇപ്പോഴും പണികള് നടക്കുന്നതേയുള്ളു. നാലും അഞ്ചും ജീവനക്കാരാണ് ഇപ്പോള് പണിക്ക് എത്തുന്നത്. അതിനാല് ഒന്നിനും വേഗമില്ല. റോഡില് നിന്ന് കെട്ടിടത്തിലേക്കു കയറാന് കഴിയുന്ന വിധത്തില് കോണ്ക്രീറ്റ് വഴി ഒരുക്കുന്നുണ്ട്. അതിന്റെ പകുതി പണി മാത്രമാണ് തീര്ന്നത്. ഒരാഴ്ച കൊണ്ട് തീര്ക്കാവുന്ന പണികള് കാലതാമസം വരുത്തി പണം തട്ടാനുള്ള കുത്സിത തന്ത്രമാണ് നടക്കുന്നതെന്ന് നാട്ടുകാര് ആരേപിക്കുന്നു.