പത്തനംതിട്ട : പത്തനംതിട്ട അബാന് മേല്പ്പാലത്തിന്റെ നിര്മ്മാണ പ്രവര്ത്തനങ്ങള് പുരോഗമിക്കുമ്പോള് നഗരത്തില് പറന്നുയരുന്ന പൊടി പടലങ്ങള് നിയന്ത്രിക്കാന് നടപടികള് സ്വീകരിക്കാതെ പത്തനംതിട്ട നഗരസഭ. നിര്മാണപ്രവര്ത്തനങ്ങള് നടക്കുമ്പോള് നഗരത്തില് സ്വാഭാവികമായി ഉണ്ടാകുന്ന പൊടി പടലങ്ങള് നിയന്ത്രിക്കുവാന് പൊടി ഉയരുന്ന സ്ഥലങ്ങളില് ടാങ്കറില് വെള്ളം തളിച്ച് ഒരു പരിധിവരെ പൊടിശല്യം നിയന്ത്രിക്കാമായിരുന്നിട്ടും യാതൊരു നടപടികളും നഗരസഭയുടെ ഭാഗത്ത് നിന്നും ഉണ്ടാകിന്നില്ല എന്നാണ് പൊതുജനങ്ങളുടെ പരാതി. പത്തനംതിട്ട സ്വകാര്യ ബസ് സ്റ്റാന്റ് പരിസരത്താണ് ഏറ്റവും കൂടുതല് പൊടി ശല്യമുള്ളത്. മൈലപ്ര ഭാഗത്ത് നിന്നും വരുന്ന സ്വകാര്യ ബസുകള് കയറിയിറങ്ങി പോകുന്ന ഭാഗത്താണ് പൊടി ശല്യം കൂടുതല്.
ഈ ഭാഗത്തെ വ്യാപാരികള് പൊടിശല്യം കാരണം ഏറെ പ്രതിസന്ധിയിലായിരിക്കുകയാണ്. വലിയ വില കൊടുത്ത് കച്ചവടത്തിനായി സാധനങ്ങള് ഇറക്കി വെക്കുമ്പോള് ഇവയെല്ലാം പൊടിപിടിച്ച് വില്പ്പന നടത്തുവാന് കഴിയാത്ത അവസ്ഥയാണ് ഉള്ളതെന്ന് വ്യാപാരികള് പറയുന്നു. ആഹാര സാധനങ്ങള് വില്ക്കുന്ന ഹോട്ടലുകളും തട്ടുകടകളും അടക്കം പൊടിശല്യം കാരണം വലിയ ബുദ്ധിമുട്ടാണ് നേരിടുന്നത്. രാവിലെ മുതല് തുടങ്ങുന്ന പൊടിക്കാറ്റ് വൈകുന്നേരം വരെയും നീണ്ട് നില്ക്കുകയും ചെയ്യും. ഇത് മൂലം ശ്വാസം മുട്ടല് അടക്കമുള്ള ഗുരുതരമായ ആരോഗ്യ പ്രശ്നങ്ങളാണ് ഇവിടുത്തെ വ്യാപാരികളും നാട്ടുകാരും നേരിടുന്നത്. എന്നിട്ടും യാതൊരു നടപടികളും സ്വീകരിക്കാന് അധികൃതര് തയ്യാറാകുന്നില്ല.
