പത്തനംതിട്ട : കുന്നുകൂടുന്ന മാലിന്യത്തിനൊപ്പം എലിശല്യവും വര്ദ്ധിച്ചതോടെ പത്തനംതിട്ട നഗരം രോഗഭീതിയിലായി. സ്ലാബുകള് സ്ഥാപിക്കാതെ വൃത്തിഹീനമായി കിടക്കുന്ന ഓടകളുടെ പരിസരത്താണ് എലി ശല്യം രൂക്ഷം. മൂടി ഇല്ലാത്ത ഓടയിലേക്കാണ് ആളുകള് മാലിന്യം വലിച്ചെറിയുന്നത്. പത്തനംതിട്ടയിലെ സിവില് സ്റ്റേഷന് കെട്ടിടത്തിന് പിന്നിലെ റോഡും ഇതിന് സമീപമുള്ള മലിന ജലം കെട്ടികിടക്കുന്ന ഓടകളും എലികളുടെ താവളമായി മാറിക്കഴിഞ്ഞു. പലപ്പോഴും കൂട്ടമായാണ് എലികളെ കാണപ്പെടുന്നത്.
നഗരത്തില്ക്കൂടി സഞ്ചരിക്കുന്ന ആളുകളുടെ ഇടയില്കൂടിയാണ് പലപ്പോഴും എലികള് ചാടി പോകുന്നത്. നഗരമധ്യത്തില് പലയിടത്തായി കുന്നുകൂടുന്ന മാലിന്യങ്ങള് ആണ് എലികള് വളരാന് സാഹചര്യം ഒരുക്കി നല്കുന്നത്. മാലിന്യക്കൂനകള് എലികളുടെ ആവാസകേന്ദ്രമായി മാറിയിട്ടുണ്ട്. പന്നിയെലികളാണ് കൂടുതലും. പത്തനംതിട്ട നഗരം രൂക്ഷമായ ആരോഗ്യപ്രശ്നങ്ങളെ അഭിമുഖീകരിക്കുമ്പോഴും ഇതൊന്നും കണ്ടില്ലെന്ന് നടിക്കുകയാണ് പത്തനംതിട്ട നഗരസഭ.
