പത്തനംതിട്ട : പത്തനംതിട്ട ജനറൽ ആശുപത്രിയിൽ ചികിത്സ തേടി എത്തിയ യുവാവ് വനിത ഡോക്ടറെ കൈയേറ്റം ചെയ്തു. കോന്നി പയ്യനാമൺ സ്വദേശി ബിജുവാണ് ആക്രമം നടത്തിയത്. ഞായറാഴ്ച രാത്രി ചികിത്സ തേടി എത്തിയ ഇയാൾ വനിതാ ഡോക്ടറോട് മോശമായി സംസാരിക്കുകയും വാക്കുതർക്കത്തിലേർപ്പെടുകയും ചെയ്തു. തുടർന്ന് ഇയാളോട് വനിതാ ഡോക്ടർ പുറത്തു പോകാൻ ആവശ്യപ്പെട്ടപ്പോൾ ഇയാൾ അക്രമാസക്തനാകുകയും ഡോക്ടറെ ആക്രമിക്കാൻ ശ്രമിക്കുകയുമായിരുന്നു.
ബഹളം കേട്ട് ആശുപത്രി ജീവനക്കാർ ഉൾപ്പടെ ഓടിക്കൂടിയതോടെ ഇയാൾ അത്യാഹിത വിഭാഗത്തിലെ ഫർണിച്ചറുകൾ തല്ലി തകർക്കുകയും ചെയ്തു. തുടർന്ന് ജീവനക്കാർ ചേർന്ന് ഇയാളെ പിടികൂടുകയും പോലീസിനെ വിവരമറിയിക്കുകമായിരുന്നു. തുടർന്ന് ആശുപത്രിയിലെത്തിയ കൺട്രോൾ സെൽ ഉദ്യോഗസ്ഥർ ഇയാളെ കസ്റ്റഡിയിലെടുത്തു.
എന്നാൽ പോലീസിൻ്റെ ചോദ്യങ്ങൾക്ക് ഇയാൾ പരസ്പര വിരുദ്ധമായ മറുപടികളാണ് നൽകിയത്. ഇയാൾക്ക് മാനസിക വിഭ്രാന്തി ഉണ്ടെന്ന് സംശയിക്കുന്നതായി പോലീസ് പറഞ്ഞു. തുടർന്ന് ഇയാളെ പോലീസ് മാനസികാരോഗ്യ കേന്ദ്രത്തിലേക്ക് മാറ്റി. സംഭവത്തെ കുറിച്ച് കൂടുതൽ അന്വേഷണം നടത്തുമെന്ന് പോലീസ് വ്യക്തമാക്കി.
