പത്തനംതിട്ട : കോവിഡ് രോഗിയെ ആംബുലന്സില് പീഡിപ്പിച്ചതിന്റെ ഓര്മ്മ മാറും മുമ്പ് പത്തനംതിട്ടയില് മറ്റൊരു പീഡനശ്രമം. അതും പത്തനംതിട്ട നഗരത്തില് സ്ഥിതിചെയ്യുന്ന ജനറല് ആശുപത്രിയില്.
പത്തനംതിട്ട ജനറല് ആശുപത്രിയിലെ പാരാമെഡിക്കല് ടെക്നിഷ്യനെ താല്ക്കാലിക ജീവനക്കാരന് കടന്നു പിടിച്ചു. ഇന്നലെ രാത്രി 11 മണിയോടെയാണ് സംഭവം. ഇരുവരും താല്ക്കാലിക ജീവനക്കാരാണ്. കോവിഡുമായി ബന്ധപ്പെട്ട് ജീവനക്കാരുടെ കുറവ് ഒഴിവാക്കാന് വേണ്ടി താല്ക്കാലിക അടിസ്ഥാനത്തില് നിയമിച്ചതാണ് ഇരുവരെയും.
ചിറ്റാര് സ്വദേശി അനന്തരാജ്(30) ആണ് ഡ്യൂട്ടി റൂമിലെത്തി പെണ്കുട്ടിയെ കടന്നു പിടിക്കുകയും അപമാനിക്കുകയും ചെയ്തത്. രാത്രി ആയതിനാല് ഡ്യൂട്ടി റൂമില് വേറെ ആരും ഉണ്ടായിരുന്നില്ല. പെണ്കുട്ടി ബഹളം വച്ചതിനെ തുടര്ന്ന് ആശുപത്രി ജീവനക്കാര് പോലീസില് വിവരം അറിയിച്ചു. രാത്രി തന്നെ ഇയാളെ പോലീസ് കസ്റ്റഡിയില് എടുത്തു.
കഴിഞ്ഞ സെപ്റ്റംബറിലാണ് അടൂര് ജനറല് ആശുപത്രിയില് നിന്നും പന്തളത്തെ സിഎഫ്എല്ടിസിയിലേക്ക് കൊണ്ടു പോയ കോവിഡ് രോഗിയായ പെണ്കുട്ടിയെ ആറന്മുളയിലെ ആളൊഴിഞ്ഞ സ്ഥലത്ത് വെച്ച് ആംബുലന്സില് പീഡിപ്പിച്ചത്. ഈ കേസിലെ പ്രതി ഇപ്പോള് ജയിലിലാണ്.
