പത്തനംതിട്ട : അണ് ഫിറ്റാണെന്ന് കണ്ടെത്തിയ പത്തനംതിട്ട മിനി സിവില് സ്റ്റേഷന് കെട്ടിടം പൊളിച്ചു മാറ്റണം എന്ന് റിപ്പോര്ട്ട് പുറത്തുവന്നതിനെ തുടര്ന്ന് ജില്ലാ കളക്ടറുടെ നേതൃത്വത്തില് കെട്ടിടം പൊളിക്കാന് തീരുമാനം എടുത്തപ്പോഴും മിനി സിവില് സ്റ്റേഷനില് പ്രവര്ത്തിക്കുന്ന സര്ക്കാര് ഓഫീസുകള് എവിടേക്ക് മാറ്റും എന്ന ചോദ്യത്തിന് മാത്രം ആര്ക്കും ഉത്തരമില്ല. ജില്ലാ അസ്ഥാനത്തെ ഒഴിഞ്ഞ കെട്ടിടങ്ങള് തേടി ഓഫീസ് അധികാരികള് ഇറങ്ങി തിരിച്ചിട്ടുണ്ട്. നാല്പത് വര്ഷം പഴക്കമുള്ള കെട്ടിടത്തിന് ബല ക്ഷയമുണ്ട് എന്നും അടിയന്തിരമായി കെട്ടിടം പൊളിച്ചുനീക്കണമെന്നും കെ.എച്ച്.ആര്.ഐ ആണ് പൊതുമരാമത്ത് വകുപ്പിന് റിപ്പോര്ട്ട് നല്കുകയും അത് പ്രകാരം കെട്ടിടം പൊളിക്കാന് കളക്ടര് തീരുമാനം എടുക്കുകയും ചെയ്തത്.
സ്ട്രോംഗ് റൂം അടക്കമുള്ള സൌകര്യങ്ങള് പല ഓഫീസുകള്ക്കും ആവശ്യമാണ്. ഇതിന് പറ്റിയ കെട്ടിടത്തിലേക്ക് മാത്രമേ ഈ ഓഫീസുകള് മാറ്റുവാന് സാധിക്കുകയുള്ളൂ. തകര്ന്നു വീഴാറായ കെട്ടിടത്തില് നിന്നും ഓഫീസുകള് അടിയന്തിരമായി മാറ്റണം എന്ന് ആവശ്യപ്പെട്ട് പൊതുമരാമത്ത് വിഭാഗം സിവില് സ്റ്റേഷനില് പ്രവര്ത്തിക്കുന്ന ഓഫീസുകള്ക്ക് കത്ത് നല്കും. കോടതി ഉള്പെടെ 24 ഓഫീസുകള് ആണ് ഇവിടെ പ്രവര്ത്തിക്കുന്നത്. എന്നാല് ജില്ലാ ആസ്ഥാനത്ത് നിന്നും വിട്ടുപോകാതെ ഇത്രയധികം ഓഫീസുകള്ക്ക് സ്ഥലം കണ്ടെത്തുക എന്നത് ബുദ്ധിമുട്ടേറിയ കാര്യമാണ്. സ്ഥലപരിമിതിയില് വീര്പ്പുമുട്ടുന്ന ജില്ലാ ആസ്ഥാനത്ത് ഇതിന് അനുയോജ്യമായ കെട്ടിടങ്ങളും ഇല്ല.
വിവിധ കോടതികള്, താലൂക്ക് ഓഫീസ്, സാമ്പത്തിക സ്ഥിതി വിവരകണക്ക് ഓഫീസ്, പൊതുമരാമത്ത് കെട്ടിട വിഭാഗം, പ്രിന്സിപ്പല് അഗ്രികള്ച്ചറല് ഓഫീസ്, ജില്ലാ പട്ടികജാതി വികസന ഓഫീസ്, ഗവ.പ്ലീഡറുടെ ഓഫീസ്, റവന്യു റിക്കവറി ഓഫീസ്, സഹകരണ സംഘം ജോയിന്റ് രജിസ്ട്രാരുടെ കാര്യാലയം തുടങ്ങിയ ഓഫീസുകള് തകര്ച്ച നേരിടുന്ന ഈ കെട്ടിടത്തില് നിലവില് പ്രവര്ത്തിക്കുന്നു. കോടതികള് മൊത്തമായി ഇവിടെ നിന്നും മാറ്റേണ്ടി വരും. പക്ഷേ എവിടേക്ക് മാറ്റും എന്നതില് ആര്ക്കും ഉത്തരമില്ല.
