പത്തനംതിട്ട : ട്രഷറി തട്ടിപ്പ് കേസില്‍ പ്രതി നശിപ്പിച്ചെന്ന് കരുതിയ ചെക്ക് ക്രൈംബ്രാഞ്ച് കണ്ടെടുത്തു. പെരുനാട് സബ് ട്രഷറിയില്‍ നടത്തിയ പരിശോധനയിലാണ് ചെക്ക് കണ്ടെത്തിയത്. കംമ്പ്യൂട്ടറിന്റെ സി.പി.യുവിനുള്ളില്‍ ഒളിപ്പിച്ച നിലയിലായിരുന്നു. 38,000 രൂപയുടേതാണ് ചെക്ക്. മുഖ്യപ്രതി ഷഹീര്‍ ഉപയോഗിച്ചിരുന്ന കംപ്യൂട്ടര്‍ പരിശോധിച്ചശേഷം ഹാര്‍ഡ് ഡിസ്ക് അന്വേഷണസംഘം പിടിച്ചെടുത്തിരുന്നു. ഹാര്‍ഡ് ഡിസ്ക് പരിശോധന നടന്നുവരുകയാണ്.
പ്രതി ഏഴുതവണ ചെക്ക് ഉപയോഗിച്ച്‌ പണം മാറിയതായി നേരത്തേ കണ്ടെത്തിയിരുന്നു. ജില്ലാ ട്രഷറിയില്‍ മൂന്നുതവണയും എരുമേലി സബ് ട്രഷറിയില്‍ രണ്ട് തവണയും മല്ലപ്പള്ളി, പെരുനാട് സബ്ട്രഷറികളില്‍ ഓരോ തവണയുമാണ് ചെക്ക് മാറിയിരിക്കുന്നത്. ഇതില്‍ പെരുനാട്ടിലെ ചെക്ക് മാത്രമാണ് നേരിട്ട് മാറിയത്. ഈ ചെക്ക് കാണാതായതാണ് തട്ടിപ്പ് പുറത്തുവരാന്‍ പ്രധാന കാരണം. അന്വേഷണം ക്രൈംബ്രാഞ്ച് ഏറ്റെടുത്ത് രണ്ടാഴ്ചയോളം പിന്നിടുമ്പോഴും ഷഹീറിനെ ചോദ്യംചെയ്യാനോ അറസ്റ്റ് ചെയ്യാനോ സാധിച്ചിട്ടില്ല.
