പത്തനംതിട്ട: വഞ്ചികപ്പൊയ്കയിൽ നഗരസഭയുടെ മൂന്നാമത് വെൽനെസ്സ് സെന്റർ ആരോഗ്യമന്ത്രി വീണാ ജോർജ് നാളെ (20) വൈകുന്നേരം 4 ന് ഉദ്ഘാടനം ചെയ്യും. 31-ാം വാർഡിൽ പ്രവർത്തനം ആരംഭിക്കുന്ന സെന്ററിന്റെ സേവനം ഉച്ചക്ക് ഒരു മണി മുതൽ വൈകുന്നേരം അഞ്ച് വരെയാണ്. ഇതോടെ നഗരസഭ പ്രഖ്യാപിച്ച 3 വെൽനെസ്സ് സെന്ററുകളും പോളി ക്ലിനിക്കും യാഥാർത്ഥ്യമായി. പരിശോധന മുറി, നിരീക്ഷണ മുറി, കാത്തിരിപ്പുകേന്ദ്രം, വെൽനെസ്സ് റൂം, ശൗചാലയം, ഫാർമസി, നേഴ്സിങ് സ്റ്റേഷൻ, ലാബ് കം സ്റ്റോർ എന്നീ സൗകര്യങ്ങളാണ് നഗര ജനകീയ ആരോഗ്യ കേന്ദ്രത്തിലുള്ളത്. ഒരു മെഡിക്കൽ ഓഫീസറുടെ നേതൃത്വത്തിൽ സ്റ്റാഫ്നേഴ്സ്, ഫാർമസിസ്റ്റ്, മൾട്ടി പർപ്പസ് വർക്കർ, ക്ലീനിങ് സ്റ്റാഫ് എന്നിവർ സേവനത്തിനായി ഉണ്ടാകും.
വർഷങ്ങൾക്ക് മുമ്പ് പ്രവർത്തനം നിലച്ച ഹെൽത്ത് സെന്ററാണ് ജനകീയ ആരോഗ്യ കേന്ദ്രമായി രൂപാന്തരം പ്രാപിച്ചത്. മൈലാടുംപാറയിലും വെട്ടിപ്പുറത്തും നഗരസഭ ആരംഭിച്ച രണ്ട് ഹെൽത്ത് ആൻഡ് വെൽനസ് സെന്ററുകൾ സമീപ പഞ്ചായത്തുകളിലെയും ജനങ്ങൾക്ക് വലിയ ആശ്വാസമാണ്. ധനകാര്യ കമ്മീഷന്റെ ഗ്രാന്റ് ഉപയോഗിച്ചാണ് വെൽനെസ്സ് സെന്ററുകൾ തയ്യാറാക്കിയിരിക്കുന്നത്. ദേശീയ തലത്തിൽ ഇക്കൊല്ലം നടത്തിയ പരിശോധനയിൽ അംഗീകാരം നേടിയ ജില്ലയിലെ ഏക ആരോഗ്യ കേന്ദ്രം കുമ്പഴയിലെ നഗരസഭയുടെ യുപിഎച്ച്സി (അർബൻ പ്രൈമറി ഹെൽത്ത് സെൻ്റർ)ആയിരുന്നു. മികച്ച അടിസ്ഥാന സൗകര്യവും ഗുണനിലവാരമുള്ള സേവനവും ജനങ്ങൾക്ക് നൽകിയാണ് നഗര ആരോഗ്യ കേന്ദ്രം നാഷണൽ ക്വാളിറ്റി അഷ്വറൻസ് സ്റ്റാൻഡേർഡ് എന്ന എൻ.ക്യു.എ.എസ് ൽ 97.75% സ്കോർ നേടിയത്.
ഇച്ഛാശക്തിയുള്ള ഭരണസമിതിയും ആത്മാർത്ഥമായ ഇടപെടലുകളും നാടിന് പ്രയോജനപ്രദം ആകുന്നതിന്റെ മികച്ച ഉദാഹരണമാണ് നഗര പ്രാഥമിക ആരോഗ്യ കേന്ദ്രവും പോളി ക്ലിനിക്കും വെൽനെസ്സ് സെന്ററുകളും ചേർന്ന നഗരസഭയുടെ ആരോഗ്യ സേവന ശൃംഖല. നഗരപരിധിയിലെ വിവിധ പ്രദേശങ്ങളിലായി സമീപ പഞ്ചായത്തുകളിലെ ജനങ്ങൾക്ക് ഉൾപ്പെടെ മികച്ച ചികിത്സാ സൗകര്യങ്ങൾ ലഭ്യമാക്കാൻ സാധിക്കുന്നത് ആരോഗ്യ രംഗത്ത് നഗരം കൈവരിച്ച നേട്ടമാണ്. ആരോഗ്യ സേവന രംഗത്തും ഇതര മേഖലകളിലും പ്രഖ്യാപിക്കുന്ന പദ്ധതികൾ സമയബന്ധിതമായി പൂർത്തിയാക്കിയും തുടർ പ്രവർത്തനങ്ങൾ ഉറപ്പാക്കിയുമാണ് ഭരണസമിതി മുന്നോട്ടുപോകുന്നത്. ജനങ്ങളുടെ ആവശ്യകതകളും നഗരത്തിന്റെ ഭാവിയും മുന്നിൽകണ്ട് നടപ്പിലാക്കുന്ന വിവിധ പദ്ധതികൾക്കൊപ്പം വെൽനസ്സ് സെൻ്ററും പൂർത്തീകരിക്കാനായതിൽ അഭിമാനമുണ്ടെന്ന് നഗരസഭാ ചെയർമാൻ അഡ്വ. സക്കീർ ഹുസൈൻ പറഞ്ഞു.
