പത്തനംതിട്ട : കോരിച്ചൊരിയുന്ന മഴയ്ക്കിടെ ഏഴുദിവസം നീണ്ടുനിൽക്കുന്ന ഓണാഘോഷത്തിന് ഘോഷയാത്രയോടെ പത്തനംതിട്ടയിൽ തുടക്കമായി. സംസ്ഥാന ആരോഗ്യവകുപ്പ് മന്ത്രി വീണ ജോർജ് ഉദ്ഘാടനം ചെയ്തു. ഓണാഘോഷം കേരളജനതയ്ക്ക് എല്ലാത്തരം അതിർവരമ്പുകൾക്കും അപ്പുറമാണ് എന്ന് മന്ത്രി പറഞ്ഞു. നഗരസഭാ ചെയർമാൻ അഡ്വ. ടി സക്കീർ ഹുസൈൻ അധ്യക്ഷത വഹിച്ചു. സംസ്ഥാന ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലുമായി ചേർന്ന് നഗരസഭയാണ് ഓണാഘോഷം സംഘടിപ്പിക്കുന്നത്. വിവിധ കലാരൂപങ്ങളുടെയും വാദ്യ മേളങ്ങളുടെയും അകമ്പടിയോടെ മാവേലി സാംസ്കാരിക ഘോഷയാത്രയുടെ ഭാഗമായി. കലഞ്ഞൂർ ബഡ്സ് സ്കൂൾ വിദ്യാർത്ഥികളുടെ ബാൻഡ് സംഘം ശ്രദ്ധേയ സാന്നിദ്ധമായി.
നഗരസഭ ടൗൺഹാളിൽ നടന്ന ഉദ്ഘാടന സമ്മേളനത്തിൽ ജില്ലാ കളക്ടർ എസ് പ്രേം കൃഷ്ണൻ ഐഎഎസ് സ്വാഗതം ആശംസിച്ചു. നഗരസഭാ പ്രതിപക്ഷ നേതാവ് എ ജാസിംകുട്ടി, കൗൺസിലർമാരായ അഡ്വ എ സുരേഷ് കുമാർ, സി കെ അർജുനൻ, എഡിഎം ജ്യോതി ബി, കുടുംബശ്രീ ജില്ലാ മിഷൻ കോ – ഓഡിനേറ്റർ ആദില എച്ച്, ഡി ടി പി സി സെക്രട്ടറി ജയറാണി കെ.ആർ തുടങ്ങിയവർ പങ്കെടുത്തു. ഒരാഴ്ച നീണ്ടു നിൽക്കുന്ന ആഘോഷങ്ങളുടെ ഭാഗമായി ടൗൺ സ്ക്വയറിൽ എല്ലാ ദിവസവും കലാ- സാംസ്കാരിക പരിപാടികൾ നടക്കും. ജില്ലയിലെ കഴിവ് തെളിയിച്ച കലാകാരന്മാർക്കും സംഘടനകൾക്കും പരിപാടികളുടെ ഭാഗമാകാൻ അവസരം നൽകും. താല്പര്യമുള്ളവർക്ക് നഗരസഭാ ഓഫീസുമായി നേരിട്ടോ +91 94478 01844 എന്ന നമ്പറിലോ ബന്ധപ്പെടാവുന്നതാണ്.
