റാന്നി : ഓൺലൈൻ പഠന കാലത്തിനു ശേഷം വിദ്യാലയത്തിൽ നടക്കുന്ന ദേശീയ ശാസ്ത്ര ദിനാചരണം ആഘോഷമാക്കി പഴവങ്ങാടി ഗവൺമെന്റ് യുപിസ്കൂൾ. ദിനാചരണത്തിന്റെ വിദ്യാലയ അനുഭവം ഏറെ നാളുകൾക്കു ശേഷമാണ് കുട്ടികൾക്ക് ലഭിക്കുന്നത്. പരിപാടിയുടെ ഭാഗമായി ശാസ്ത്ര പ്രദർശനം, ശാസ്ത്രജ്ഞന്മാരുടെ ഫോട്ടോ പ്രദർശനം, ശാസ്ത്ര കളിപ്പാട്ട പ്രദർശനം, ഓൺലൈൻ പഠനകാലത്തെ പഠനോപകരണ പ്രദർശനം, കയ്യെഴുത്തു മാസിക പ്രകാശനം,ഡിജിറ്റൽ ഫ്ലിപ്പ് ബുക്ക് പ്രസിദ്ധീകരണം, ശാസ്ത്രക്വിസ്, നാടകം, സി. വി രാമൻ ജീവിതം നേട്ടങ്ങളും അവതരണം തുടങ്ങിയ പ്രവർത്തനങ്ങൾ നടന്നു.
മുഴുവൻ ക്ലാസ്സുകളെയും പങ്കാളികളാക്കി നടത്തിയ പരിപാടി പഴവങ്ങാടി ഗ്രാമപഞ്ചായത്ത് പ്രസിഡണ്ട് അനിത അനിൽ കുമാർ ഉദ്ഘാടനം ചെയ്തു. വാർഡ് അംഗം ബനിറ്റ് മാത്യു അധ്യക്ഷത വഹിച്ചു. പ്രദർശനം റാന്നി ബി ആർ സി ബ്ലോക്ക് പ്രോജക്ട് കോഡിനേറ്റർ ഷാജി എ സലാം ഉദ്ഘാടനം ചെയ്തു. സി ആർ സി കോ-ഓർഡിനേറ്റർ സൈജു സക്കറിയ കുട്ടികളുടെ കയ്യെഴുത്തുമാസിക ”ലൂമിനസ് 2022” പ്രകാശനം ചെയ്തു. ഡിജിറ്റൽ ഫ്ലിപ്പ് ബുക്ക് പ്രഥമാധ്യാപകൻ രാജ്മോഹൻ തമ്പി പ്രകാശനം ചെയ്തു.
ശാസ്ത്ര രംഗം കോ -കോർഡിനേറ്റർ എഫ്. അജിനി പ്രവർത്തനങ്ങൾ ഏകോപിപ്പിച്ചു. പി ടി എ പ്രസിഡന്റ് ബാബു തോമസ്, ഷിബി സൈമൺ, ബിന്ദു ഗോപകുമാർ, സ്മിത ഓമനക്കുട്ടൻ, മിനി പി. സദാശിവൻ, നിഷ വിജയൻ, റഷീദ ബീവി, അച്ചാമ്മ സൈമൺ എന്നിവർ പ്രസംഗിച്ചു. എം. എസ് ടി.ടി. ഐ അധ്യാപക വിദ്യാർഥികൾ, അധ്യാപകർ, രക്ഷിതാക്കൾ, ജനപ്രതിനിധികൾ, പൊതുജനങ്ങൾ തുടങ്ങിയവർ പരിപാടിയിൽ പങ്കെടുത്തു.
