കൊച്ചി: മുന് മന്ത്രി കെ.ടി.ജലീലിന്റെ പരാതിയില് തിരുവനന്തപുരം കന്റോണ്മെന്റ് പോലീസ് സ്വപ്ന സുരേഷിനും പി.സി.ജോര്ജിനുമെതിരെ രജിസ്റ്റര് ചെയ്ത കേസില് കുറ്റപത്രം ഉടന്. തിരുവനന്തപുരത്തേയും പാലക്കാട്ടേയും കേസുകള് റദ്ദാക്കണമെന്ന സ്വപ്നയുടെ ഹര്ജികള് ഹൈക്കോടതി തള്ളിയതിന് പിന്നാലെയാണ് കേസില് കുറ്റപത്രം നല്കാനുള്ള നടപടികള് അന്വേഷണ സംഘം വേഗത്തിലാക്കിയത്. ജലീലിന്റെ പരാതിയില് കേസെടുത്തത് കന്റോണ്മെന്റ് പോലീസ് ആണെങ്കിലും നിലവില് അന്വേഷണം നടത്തുന്നത് പ്രത്യേക സംഘമാണ്.
സ്വപ്നയ്ക്കും പി.സി.ജോര്ജിനും പുറമേ സരിത്തിനെയും ഈ കേസില് പ്രതിയാക്കും. കന്റോണ്മെന്റ് പോലീസ് എടുത്ത കേസ് പ്രകാരം സ്വപ്ന സുരേഷിനും പി.സി.ജോര്ജിനും എതിരെ ജാമ്യം ലഭിക്കാവുന്ന വകുപ്പുകളാണ് ചുമത്തിയിരുന്നത്. എന്നാല് പ്രത്യേക അന്വേഷണ സംഘം കോടതിയില് റിപ്പോര്ട്ട് നല്കിയത് ജാമ്യം ലഭിക്കാത്ത വകുപ്പുകള് ചേര്ത്താണ്. എന്നാലും അറസ്റ്റിന് നീക്കമുണ്ടാകില്ല എന്നാണ് സൂചന. പകരം കുറ്റപത്രം വേഗം നല്കി വിചാരണ നടപടികളിലേക്ക് നീങ്ങാനാണ് അന്വേഷണ സംഘം ലക്ഷ്യമിടുന്നതെന്നാണ് ഉന്നത പോലീസ് വൃത്തങ്ങള് നല്കുന്ന സൂചന.