കൊച്ചി : പാലാരിവട്ടത്ത് പി.സി ജോര്ജിനെതിരേ പിഡിപി പ്രതിഷേധം. പി.സി ജോര്ജിനെതിരേ പ്രതിഷേധവുമായി എത്തിയ പിഡിപി പ്രവര്ത്തകരെ പാലാരിവട്ടം പോലീസ് അറസ്റ്റ് ചെയ്തു നീക്കി. വിദ്വേഷ പ്രസംഗ കേസില് പാലാരിവട്ടം പോലീസ് സ്റ്റേഷനില് ജോര്ജ് ഹാജരാകുന്ന വിവരമറിഞ്ഞെത്തിയ പ്രതിഷേധക്കാരെയാണ് പോലീസ് ബലംപ്രയോഗിച്ച് അറസ്റ്റ് ചെയ്തത്. അസി. കമ്മീഷണറുടെ നേതൃത്വത്തില് വന് പോലീസ് സന്നാഹം സ്റ്റേഷന് മുന്നില് തമ്പടിച്ചിരുന്നു. പ്രതിഷേധക്കാരോട് പിരിഞ്ഞുപോകാന് പോലീസ് ആവശ്യപ്പെട്ടെങ്കിലും കൂട്ടാക്കാതെ വന്നതോടെയാണ് അറസ്റ്റുണ്ടായത്.
വെണ്ണല വിദ്വേഷ പ്രസംഗ കേസില് മൊഴി നല്കാനാണ് ജോര്ജ് ഇന്ന് പാലാരിവട്ടം പോലീസ് സ്റ്റേഷനില് ഹാജരാകുന്നത്. അതിനിടെ തിരുവനന്തപുരത്ത് ഹിന്ദുമത സമ്മേളനത്തില് നടത്തിയ പ്രസംഗത്തിന്റെ പേരില് രജിസ്റ്റര് ചെയ്ത കേസിലെ ജോര്ജിന് നല്കിയിരുന്ന ജാമ്യം കോടതി റദ്ദാക്കിയിരുന്നു. ഇതോടെ ഹാജരാകുന്നതിന് പിന്നാലെ അറസ്റ്റുണ്ടാകുമെന്നും ഉറപ്പായി.
