തിരുവനന്തപുരം: സര്വ്വീസ് ആറുമാസത്തിലധികമെങ്കില് ഒരുവര്ഷമായി കണക്കാക്കുന്ന വ്യവസ്ഥ ഒഴിവാക്കി സര്ക്കാര് ജീവനക്കാരുടെയും അധ്യാപകരുടെയും പെന്ഷന് നിര്ണയരീതിയില് മാറ്റം വരുത്തി. ആറു മാസത്തിലേറെ സര്വ്വീസ് ഒരുവര്ഷമായി കണക്കാക്കിയാണ് നിലവില് പെന്ഷന് നിശ്ചയിച്ചിരുന്നത്.
മൂന്നുമാസമോ അതില് കൂടുതലോ ഒമ്പത് മാസത്തില് കുറവോ ആയാല് അരവര്ഷത്തെ സര്വ്വീസ് കണക്കാക്കാനാണ് പുതിയ വ്യവസ്ഥ. മൂന്നുമാസത്തില് കുറവുള്ള സര്വ്വീസ് ഒഴിവാക്കും. ഒമ്പത് മാസത്തില് കൂടുതലുള്ള സര്വ്വീസ് ഒരുവര്ഷമായി കണക്കാക്കും. സര്വ്വീസ് ചട്ടത്തിലെ 57, 64, 65 വകുപ്പുകളടക്കം ഉള്പ്പെടുത്തി ഭേദഗതി വരുത്തി സര്ക്കാര് അസാധാരണ ഗസറ്റ് പുറപ്പെടുവിച്ചു.
ഏതാനം ജീവനക്കാര് ഹൈക്കോടതിയില് നല്കിയ കേസിന്റെ കൂടി അടിസ്ഥാനത്തിലാണ് നടപടി. അധികദിനങ്ങള് സംബന്ധിച്ച വിശദ റിപ്പോര്ട്ട് വകുപ്പുകളില്നിന്ന് നല്കണമെന്ന് നിര്ബന്ധമാക്കി. ഇതിന്റെ മാതൃകയും ഗസറ്റിലുണ്ട്. ദിവസങ്ങള് കണക്കാക്കുന്നത് സംബന്ധിച്ചും വിശദമായി പ്രതിപാദിച്ചിട്ടുണ്ട്. ഒമ്പത് വര്ഷവും ഒരുദിവസവും സര്വ്വീസുണ്ടെങ്കില് 10 വര്ഷമായി കണക്കാക്കും. മിനിമം പെന്ഷന് ഉറപ്പാക്കാന് പത്തുവര്ഷം വേണമെന്നതിനാലാണിത്.
29 വര്ഷവും ഒരുദിവസവും വന്നാല് 30 വര്ഷമായി കണക്കാക്കി ഫുള്പെന്ഷന് നല്കുന്നത് നിര്ത്തി. 32 വര്ഷവും ഒരു ദിവസവും ഉണ്ടെങ്കില് 33 വര്ഷമാക്കി ഗ്രാറ്റ്വിറ്റിയും നല്കില്ല. അതിവര്ഷത്തെ അധിക ദിനങ്ങള് പെന്ഷന് പരിഗണിക്കുമെന്നും ഉത്തരവില് പറയുന്നു.
