തിരുവനന്തപുരം: ബലാത്സംഗക്കേസിലെ പരാതികാരിയെ മര്ദിച്ചെന്ന കേസിലും എല്ദോസ് കുന്നപ്പിള്ളി എംഎല്എക്ക് മുന്കൂര് ജാമ്യം. തിരുവനന്തപുരം അഡീഷനല് സെഷന്സ് കോടതിയാണ് ഉപാധികളോടെ മുന്കൂര് ജാമ്യം അനുവദിച്ചത്. അഭിഭാഷകന്റെ ഓഫീസില് വെച്ച് മര്ദിച്ചു എന്ന കേസിലാണ് മുന്കൂര് ജാമ്യം. ഒരു ലക്ഷം രൂപയുടെ ജാമ്യത്തുക കെട്ടിവെക്കണം, ഈ മാസം 10 നും 11 നും ഇടയ്ക്ക് അന്വേഷണ ഉദ്യോഗസ്ഥന് മുന്പില് ഹാജരാകണം, രാജ്യമോ, സംസ്ഥാനമോ വിട്ടു പോകരുത് എന്നിവയാണ് ഉപാധികള്.
പരാതിക്കാരിയെ അഭിഭാഷകന്റെ ഓഫീസില് എത്തിച്ച് മര്ദിച്ചത് എല്ദോസ് ആണെന്നും ഇത് അഭിഭാഷകര് കണ്ടുനിന്നെന്നുമായിരുന്നു പ്രോസിക്യൂഷന് വാദം. സ്ത്രീത്വത്തെ അപമാനിക്കല്, വ്യാജ രേഖ ചമയ്ക്കല്, മര്ദ്ദനം എന്നീ കുറ്റങ്ങള് ചുമത്തിയാണ് വഞ്ചിയൂര് പോലീസ് കേസ് രജിസ്റ്റര് ചെയ്തത്. നേരത്തെ ബലാത്സംഗക്കേസിലും എല്ദോസിന് മുന്കൂര് ജാമ്യം അനുവദിച്ചിരുന്നു.
