കൊല്ലം : ഒരു തവണ പയറ്റി വിജയിച്ച തന്ത്രം വീണ്ടും പരീക്ഷിക്കാനെത്തിയ മോഷ്ടാക്കള്‍ കൈയോടെ പിടിയിലായി. അഞ്ചാലുംമൂട് ജംഗ്ഷനിലെ ഇന്ത്യന്‍ ഓയില്‍ പമ്പിലെ മേശയില്‍ നിന്ന് പണം കവരാനെത്തിയ സംഘമാണ് പിടിയിലായത്. ആലപ്പുഴ കാഞ്ഞിരംചിറമുറി തെക്കനാര്യനാട്, കനാല്‍ വാര്‍ഡില്‍ ബംഗ്ലാവ് പറമ്പില്‍ ഷെരീഫ് (60), മണ്ണാഞ്ചേരി കണ്ണന്തറ വെളിയില്‍ വീട്ടില്‍ മുഹമ്മദ് ഇക്ബാല്‍ (60), കോട്ടയം ചങ്ങനാശേരി വാഴപ്പള്ളി ചാമപറമ്പില്‍ വീട്ടില്‍ അബ്ദുല്‍ ലത്തീഫ് (74) എന്നിവരാണ് പിടിയിലായത്.
മേയ് 7ന് രാവിലെ 11ന് കുപ്പിയുമായി പെട്രോള്‍ വാങ്ങാനെന്ന വ്യാജേന മൂവര്‍ സംഘം പമ്പിലെത്തിയിരുന്നു. സംഘത്തിലെ ഒരാള്‍ കുപ്പിയില്‍ പെട്രോള്‍ വാങ്ങുകയും മറ്റ് രണ്ടുപേര്‍ ഈ സമയം പമ്പിന്റെ ഐലന്റിലുള്ള മേശയില്‍ സൂക്ഷിച്ചിരുന്ന 43525 രൂപ മോഷ്ടിക്കുകയും ചെയ്തു. ഇതേ സംഘം ശനിയാഴ്ച വൈകിട്ട് വീണ്ടുമെത്തി. പമ്പ് ജീവനക്കാര്‍ സി.സി ടി.വി ദൃശ്യങ്ങളില്‍ നിന്ന് പ്രതികളുടെ മുഖം മനസില്‍ സൂക്ഷിച്ചിരുന്നു.
സംഭവം ശ്രദ്ധയില്‍പ്പെട്ട പമ്പിലെ മാനേജരും ജീവനക്കാരും സംഘത്തെ തടഞ്ഞുവച്ച്‌ അഞ്ചാലുംമൂട് പോലീസിന് കൈമാറുകയായിരുന്നു. അഞ്ചാലുംമൂട് എസ്ഐ റഹീമിന്റെ നേതൃത്വത്തില്‍ എസ്‌ഐമാരായ അബ്ദുല്‍ ഹക്കീം, രാജേന്ദ്രന്‍പിള്ള, ജയചന്ദ്രന്‍, പ്രദീപ്, എസ്.സി.പി.ഒ ബിജു, നജീബ് എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.
