പയ്യോളി : പെട്രോള് പമ്പില് ഡീസല് വാങ്ങാനെന്ന വ്യാജേന ബൈക്കിലെത്തിയ രണ്ടംഗ സംഘം ജീവനക്കാരന്റെ ബാഗ് തട്ടിയെടുത്ത് 55,000 രൂപയോളം കവര്ന്നു. രാത്രി പതിനൊന്നരയോടെ തിക്കോടി ദേശീയപാതയോരത്തെ പെട്രോള് പമ്പിലാണ് സംഭവം നടന്നത്. ബോട്ടിലുമായി പമ്പിലെത്തിയ സംഘം 80 രൂപക്ക് ഡീസല് തരാന് ജീവനക്കാരനായ ബംഗാള് സ്വദേശി മന്ജൂജ് മൊണ്ടലിനോട് ആവശ്യപ്പെടുകയായിരുന്നു. ബോട്ടില് വാങ്ങി ഡീസല് എടുക്കാനായി തിരിഞ്ഞു നില്ക്കവെ മന്ജൂജിന്റെ കക്ഷത്തുണ്ടായിരുന്ന പണമടങ്ങിയ ബാഗ് നിമിഷനേരം കൊണ്ട് തട്ടിപ്പറിച്ച് കവര്ച്ച സംഘം ബൈക്കില് കടന്നുകളയുകയായിരുന്നു. മോഷണസംഘത്തെ പിന്തുടര്ന്ന് റോഡ് വരെ ജീവനക്കാരന് ഓടിയെങ്കിലും പിടികൂടാനായില്ല. കൊയിലാണ്ടി ഭാഗത്തുനിന്ന് എത്തിയ ബൈക്ക് പയ്യോളി ഭാഗത്തേക്കാണ് പോയത്. സംഭവത്തിന്റെ ദൃശ്യങ്ങള് സ്ഥാപനത്തിലെ സി.സി ടി.വി കാമറകളില് പതിഞ്ഞിട്ടുണ്ട്. പയ്യോളി പോലീസ് അന്വേഷണമാരംഭിച്ചു.
